Sola skein på siderfestivalen
Skyene opna seg og sola titta fram i god tid før lokalmatmarknaden og skjenkjeområdet opna på siderfestivalen i Øystese.
– Festivalen har vore fantastisk, fortel festivalsjef Marit Buttingsrud sundag føremiddag.
Ho fortel at både seljarane i marknadsområdet og produsentane på skjenkjeområdet rapporterte om betre sal enn i fjor.
– Det har truleg litt med vêret å gjera. Godt vêr betyr mykje. Det kjem både fleire gjester, samstundes som det blir lettare for oss arrangørar når me slepp å hasteflytta arrangement innandørs, seier ho.
For Buttingsrud var høgdepunktet med festivalen alle dei blide folka ho møtte.
– Alle eg har snakka med, har vore blide og nøgde. Det gjeld både publikummarar, seljarar og siderprodusentar. Det gjev meg mykje energi å få slike attendemeldingar, fortel ho.
I år som i fjor var siderkonkurransen for amatørar. Det kom inn 51 bidrag. Serina Sandven frå Norheimsund fekk prisen for beste unge siderprodusent. Sideren hennar kom også på 4.-plass i klassen for tradisjonell sider. Klassen vart vunnen av ein sider frå Jørund Olav Grønsnes frå Grimo.
Pæresideren «Pærri», laga av Lisa Alvavoll frå Lofthus, vann den opne klassen, medan issideren Fimbulvinter vart kåra til den beste sideren uansett klasse. Produsenten lagar sider under pseudonymet Oliver, og ønskjer ikkje å ha namnet i avisa.
Målprisen, som vart delt ut under festivalen, gjekk i år til Tecno VVS AS. Ingunn Hildonen Teigland i Kvam Mållag grunngav valet med at verksemda brukar nynorsk i all kommunikasjon, sjølv om det truleg ville vore enklare og billegare å bruka bokmål eller utanlandsk.
