Sjå bileta: Dei kom seg ut på Kom deg ut-dagen
Snøen lava tidvis ned, men i turlag er ikkje slikt noko hinder å snakka om. Tvert om.
— Det finst ikkje dårleg vêr, seier Geir Morten Utskot i grillhytta ved Sjusete skisenter.
Turlagskasseraren var ein av fleire lokale heltar som ofra litt av sundagen for å tilby folk bålpannegrillla pølser, natursti og lågterskelpremiar i tre strake timar. Høvet var Kom deg ut-dagen, som lokale turlag markerte på over 200 stader i heile landet.
Rundt grillhytta fall snøen tett då HF kom til staden vel ein time etter opninga, og ikkje så mange hadde funne vegen til Sjusete enno. Etter kvart strøymde fleire til — og snøfallet, som har kome og gått heile helga, tok etter kvart ein pause.
Ifylgje ei pressemelding frå Den norske turistforening sundag deltok nærare 40.000 personar i ulike arrangement på Kom deg ut-dagen. Noko av poenget er å inspirera dei som ikkje er vane med friluftslivet, til å oppdaga det, seier generalsekretær Dag Terje Klarp Solvang. Dagen har vore skipa til sidan 2006, men aldri med fleire arrangement enn i år.
Ettersom turlag i all hovudsak går tur utandørs, der det er enkelt å halda avstand og smittefaren har vist seg å vera liten, er dei ikkje mellom dei hardast koronaråka. Likevel har smittevernrestriksjonane ført til ulemper, ikkje minst for bruken av turlagshyttene. No er det meste tilbake til normalen, fortel leiar i Kvam Turlag, Kjell Inge Tufte Tyssen. Unntaket er at ein framleis må tinga seng på førehand. Å koma innom spontant er ikkje noko problem.
Turlaget har årsmøte måndag 7. februar. Tyssen, som stiller til attval som leiar, reknar med at det vert ei form for Kvam i kryss og krakje også i år. Turprogrammet for sesongen er ikkje heilt spikra enno, men ikkje så langt unna, fortel han.
