Nissete marsj og førjolskos i Herand
Både små og store i Herand marsjerte saman for å møta nissen. Også i år fann den gåvmilde mannen vegen til bygda.
Kring tjue born og ei gruppe vaksne møtte opp ved kulturhuset då Herand Idrettslag inviterte til nissemarsj onsdag kveld.
Sjå bilete frå nissemarsjen her:
– Kjempeheldige!
Fleire av borna stilte opp i nissekostyme og bar kvar sin brennande fakkel. Blå grader såg ikkje ut til å skremma gjengen som saman marsjerte nedover til kaien i måneskinet.
Ved kaien vart dei marsjerande møtte med varm kakao og bollar. Det vart fleire rundar rundt joletreet, og kjende jolesongar ljoma ut i bygda. Etter nokre vers av På låven sitter nissen dukka den skjeggete mannen i raude klede opp. Han tok seg god tid til å dela ut godteposar til alle borna.
– Me kunne ikkje ha vore heldigare med vêret! seier Hildegunn Samland.
Leiaren i idrettslaget i Herand var svært nøgd med at det var stjerneklart og fullmåne då laget, saman med nokre representantar for bedehuset, inviterte til nissemarsj.
Sjå video frå nissemarsjen her:
Joleavslutning for borna
Ifylgje Samland har marsjen vorte arrangert i fleire år, men han hadde ein ufrivillig pause under pandemien. Tilstellinga er ei form for joleavslutning for gjengen i idrettslaget, men også andre er velkomne, forklarar ho.
Haldor Tuvin stod for musikken saman med Arjen L. H. Stolk og Marna Roer. Tuvin har vore med på tilstellinga i mange år. Han forklarar at det tidlegare har vore born frå kvardagsskulen i Herand som har stått for ei markering med joletregang og -songar.
Då det ikkje er elevar på kvardagsskulen i år, tykte han det var ekstra flott å kunna slå seg saman med idrettslaget i bygda.
– Dette er ein fin måte å samlast på, seier han.
