Over 70 personar møtte opp til jonsokfeiring på Storeteigen torsdag.

Mangla berre éin ting

Felemusikk, lukta av nyslått gras og tente bålpanner møtte dei som kom til Storeteigen for å feira jonsok torsdag.

Ragnhild Økland Børven
Publisert Sist oppdatert

Det meste var altså på plass, men noko mangla likevel: eit brurepar. Kabuso, som var arrangør, enda i tidsnaud i år, fortel Stig Lundblad-Sandbakk på vegner av kunsthuset i Øystese. Men at eit brurepar ikkje dukka opp, såg ikkje ut til å plaga nokon. I tunet og på bakkane var det nok å hengja fingrane i. Heser, til dømes.

Simon (3) frå Tyskland brukar ikkje å feira jonsok, men han såg ut til å ha det moro. Han og familien er på ferie i Øystese.

– Det store målet for dagen er å få fylt opp i hesa vår. Det må vera råd å gjennomføra. Og for dei som lurar på om det er tidsriktig eller historisk korrekt med strips i hesa, så er svaret på det: Ja, absolutt! Eg trur dei likte ny teknologi i gamle dagar òg, sa Lundblad-Sandbakk då han ynskte velkomen.

I Torsteinsstova gjekk borna på jakt. Stova, som vart bygd som røykstove i 1661 og bygd på med bu og loft i 1712, rommar utstyr og innreiing frå gamle dagar. Mellom alt det gamle var det plassert ti gjenstandar på under 100 år som ein skulle finna.

Alette Fykse (6) fann fort ut at denne telefonen ikkje passa inn i Torsteinsstova.

Alette Fykse fann ein telefon som ikkje høyrde heime. Saman med venninna hennar, Gurine Vangdal, fann ho ei datamaskin òg. Ho var godt gøymd og spela av fuglelydar. Etterpå viste det seg at jentene rett og slett hadde vore for gode til å leita. Datamaskina var nemleg ikkje ein del av rebusen, men kunst.

Sjå fleire bilete frå feiringa her:

Desse jentene spela Mikado. Frå venstre: Oda Øvsthus Kolltveit, Ada Måge, Sigrid Bleie, Mathilde Flakstad Oma og Ona Kjosås.
Sigrid Bleie konsentrerer seg om spelet. Om ein av pinnane rører på seg, er det nestemann sin tur.
Hengekøya fekk mildt sagt svinga seg denne ettermiddagen. Om det var ei god oppleving for dei som torde å prøva henne, er uvisst.
Oskar Øygard Oma (2) jobba som ein helt med slåtten.
Besteforeldra til Oskar, Lars Arvid Oma og Lisbeth Fredheim Oma, var med.
Nokre gjenstandar peika seg fortare ut enn andre i konkurransen i Torsteinsstova.
Tord Børven (2) og Eirik Børven (5) var med mamma Åshild Klyve på jonsokfeiring. Her kosar dei seg med sjokoladekjeks.
Ikkje alle er like glade i mykje folk og leven. På taket slepp ein unna begge delar.
Det var ingenting å seia på innsatsen då hesa skulle gjerast klar.
Jakob Kjosås får hjelp av Oda Øvsthus Kolltveit til å koma høgt nok opp. Jarand Bleie hadde heldigvis metermål i lomma, og kontrollerte jobben som vart gjord.
biletseriar storeteigen biletseriar kultur
Laga med Labrador CMS