Klar, ferdig, gå!

Allereie i titida var dei fyrste borna på plass med ski på beina. Ei bålpanne sette stemninga i startområdet, og 24 ivrige deltakarar gjorde seg klare til renn. Iveren var så stor at då startskotet gjekk, vart det ein einaste stor fellesstart.

Med unntak av litt ekstraarbeid for tidtakarane enda det godt, og borna stilte seg fint på rekkje og venta på tur etterpå.

Sjå bilete frå skirennet her:

— Det er bra at alle er på hogget, sa tidtakar Håvard Flotve.

Godt nøgd

— No har eg stått så lenge på ski at det kjem røyk ut av munnen min!

Det sa deltakar Sigmund D. Tveitnes etter målgang.

— Korleis gjekk det i dag?

— Eg datt litt, men det gjekk fint.

Ifylgje Sigmund sjølv bur han like ved løypa, og han var difor godt kjend med kvar han skulle gå.

— Du har øvd deg?

— Ja, eg kan løypa. Og om det går for fort, berre hoppar eg rett på rumpa.

Men litt fart likar han. Det var i alle fall dei lange nedoverbakkane som fall mest i smak.

— Det gjekk så fort!

— Folk kosar seg

Yngstemann på laurdagens startstrek var berre to år gammal, og dei eldste deltakarane gjekk i 6. klasse. Barnehageborna gjekk ei løype på 600 meter, og dei eldre borna gjekk ei løype på éin kilometer.

På grunn av dårleg vêr var dette det fyrste skirennet så langt denne sesongen. Det fortel Torunn Lutro, som sit i styret i Strandebarm idrettslag og er med i skigruppa.

— Eg håpar det ikkje vert det siste, seier Lutro.

Tilbakemeldingane frå foreldre og deltakarar er utelukkande positive, fortel ho.

— Det verkar som folk kosar seg!