Kort tid før folketoget starta, dukka sola opp. Dimed kunne dei som gjekk, nyta varmen frå solstrålane på veg ned mot Torget i Ålvik. Fremst går Cay Nordhaug (t.v.), talar og representant for Industri Energi, og Sverre Linga, leiar i Aalvik Arbeiderforening.

– I år viste det seg at dette er ekstremt viktig å halda fram med

Det var få ledige sete i Folkets Hus då arbeidardagen vart markert i Ålvik måndag. – Dette var heilmaks, seier leiar Sverre Linga i Aalvik Arbeiderforening.

Mari Ulvund
Journalist
Publisert

1. mai-feiringa i bygda gjekk føre seg i tradisjonelle former. Dagen byrja med flaggheising og gudsteneste, og vart avslutta med talar for dei eldste og klovneshow for dei yngste.

Dei frammøtte kunne samlast over ein kopp kaffi og noko å bita i både før og etter folketoget. Det var også rigga til med stasjonar med andletsmåling, elektriske bilar og hoppeslott utanfor forsamlingshuset.

Fleire samlast i området utanfor forsamlingshuset i Ålvik før folketoget starta. Russen stilte opp i bilar.

– Betyr mykje

Linga fortel til HF at han er svært nøgd med markeringa. Det er alltid usikkert kor mange som kjem for å gå i tog, kor mange tilhøyrarar det vert i salen og korleis vêret vert, seier han. Leiaren i arbeidarforeininga rosar kvemmingane.

– Folk er flinke til å stilla opp. Dessutan er det like mange frå Ålvik som frå andre stader i Kvam, så det er tydeleg at denne dagen betyr mykje for mange, seier Linga.

Frå vestre: Nils-Otto Yndestad, leiar Sverre Linga i Aalvik Arbeiderforening, hovudtalar Cay Nordhaug og ordførar Torgeir Næss slo av ein prat mellom folketoget og programmet i Folkets Hus.

Ifylgje han er markeringa av arbeidardagen like viktig som før. Linga viser mellom anna til storstreiken i LO- og NHO-området i april.

– Eg har uttala for ein del år sidan at denne dagen til ei viss grad hadde utspela si rolle. Men så kom denne situasjonen. I år viste det seg at dette er ekstremt viktig å halda på med. Me har fått til noko me ikkje hadde trudd var mogleg, seier han.

Sjå video frå folketoget:

Sjå bilete frå 1. mai-markeringa:

Varg Aalvik (4) var ein av fleire ivrige elbil-køyrarar.
Fleire tok seg ein tur i det vesle hoppeslottet utanfor Folkets Hus.
Randi Rykkje-Torpe (t.v.) vart forvandla til ein leopard. Både ho og systera, Irene, tykte resultatet vart bra.
Frå venstre: Også Selma Fykse, Ada Måge og Ona Kjosås måla andleta.
Russen, som også deltok i folketoget, var populær blant dei minste.
Frå venstre: Flaggberarane Anders Aalvik, Anders Gjelseng og Anders Lie Rykkje. Bak står faneberar Anders Fiksen.
Frå starten på toget, på brua over Dalselva.
I toget var kraftprisar, krigen i Ukraina, inntekta til bøndene og faste arbeidsplassar nokre av temaa for årets parolar.
Frå folketoget.
Frå folketoget.
Ålvik Musikklag marsjerte ned mot Torget. Også Øystese Musikklag bidrog i toget.
Tradisjonen tru vart det lagt ned blomar ved føtene til Arbeidsmannen.
Fleire nytta høvet til både å fotografera og filma då korpset spela på Torget.
Frå folketoget, på veg tilbake frå Torget til Folkes Hus.
Frå venstre: Kristi Rykkje-Torpe, Irene Rykkje-Torpe, Eli Hamre og Randi Rykkje-Torpe var godt nøgde med russekortfangsten.
Frå folketoget.
Ordførar i Kvam, Torgeir Næss (Ap, midt i biletet) og Eusebiu Amanalachioai (Ap), til venstre for Næss, var to av dei som deltok i toget.
Før talane spela musikklaga i Ålvik og Øystese.
Kor i alle dagar song etter at musikklaga var ferdige på scena.
Leiar i Aalvik Arbeiderforening, Sverre Linga, leia programmet.
Hovudtalar Cay Nordhaug var takksam for å få ta del i markeringa i Ålvik. – Tenk å vera så heldig å verta invitert til ein stad der industrien er sjølve hjartet av samfunnet, sa han i innleiinga.
Som takk for at han stilte opp og heldt tale, fekk Cay Nordhaug ein pose med lokale varer av Sverre Linga, leiar i Aalvik Arbeiderforening.
Mange born var samla i gymsalen til skulen for å få med seg klovneshowet.
Klovnen lokka fram latteren fleire gonger i løpet av framsyninga.
På slutten av klovneshowet fekk dei som ville, klappa kaninen som plutseleg dukka opp.
Busskuret i Vikedal var pynta med flagg både inni og utanpå.

– Prioriter rett bruk av krafta!

Etter den faste runden frå Folkets Hus, ned til Torget og nedlegging av blomar ved Arbeidsmannen, vart det musikalske innslag i Folkets Hus. Dei var det musikklaga i Ålvik og Øystese og damekoret Kor i alle dagar som stod for.

Sosial dumping og anstendig arbeidsliv var noko av det hovudtalar Cay Nordhaug, representant for Industri Energi, tok føre seg. Han sa mellom anna at heiltidskultur og faste stillinger ein føresetnad for å byggja eit samfunn med kompetente og dyktige arbeidstakarar.

– Faste stillingar er, og skal vera, hovudregelen i norsk arbeidsliv. Tryggleik, ikkje utryggleik, skal vera det som definerer arbeid i Noreg, sa Nordhaug.

Hovudtalar Cay Nordhaug takka dei frammøtte i talen. – I dag er det slik at dykkar kamp for eit anstendig arbeidsliv, gode velferdsordningar og gratis skule, som gjer at våre born får god utdanning og gode karrieremoglegheiter som ikkje var gjevne for berre nokre få år tilbake, sa han.

Han var innom tema som streiken, kjøpekraft, krigen i Ukraina og kraftsituasjonen i Noreg. Han meiner det er viktig å ta i bruk vasskrafta for å løysa dagens utfordringar, og å nytta henne til føremål her heime.

– Me må prioritera krafta til dei viktige og riktige tinga. Me skal bruka krafta til å skapa arbeidsplassar. Til å skapa gode lokalsamfunn. Om me skal bruka henne til velferd, slik me har gjort i over hundre år.

Både ålvikarar og tilreisande tok turen innom Folkets Hus for å lytta til dei musikalske innslaga og talane.

– Trefte godt

Etter at programmet i forsamlingshuset var ferdig, fortalde Sverre Linga at han var godt nøgd med årets hovudtalar.

– Når ein ser kor mange som møtte opp, er det tydeleg at me har valt ein talar som er på det nivået me ynskjer. Eg likar når me får tak i gode folk, men som ikkje treng vera store namn. Me trefte veldig godt, slår han fast.

Dei yngre avslutta dagen med klovneshow i gymsalen på skulen. Det var mange som ynskte å vera assistenten til klovnen.
politikk fritid ålvik høgtider biletseriar
Laga med Labrador CMS