Fuktig affære kring julegrana og -bøken
Ikkje ei peparkake var tørr då tradisjonen med julegateopning vart halden i hevd sundag.
Trass skikkeleg skitvêr – for dei som mislikar regn – strøymde mange til då næringslaga i Norheimsund og Øystese skipa til kvar si markering av opninga av julegatene.
I Øystese førte tekniske problem til vanskar med å få lysa i bøken ved Kunsthuset Kabuso tende etter nedteljinga, men det ordna seg etter kvart med hjelp av Stig Lundblad-Sandbakk i Kabuso. Kluret var ikkje heilt uventa; Marit Buttingsrud i næringslaget hadde nemleg ei aning om at det kunne koma til å oppstå overbelasting.
Vilma Vencė heldt appell, medan Øyvind Soldal leia markeringa. Skulemusikklaget, utstyrt med pannelykter, tonesette stunda. Attåt det heile vart det servert gløgg og peparkaker.
I Norheimsund kom lysa på som dei skulle etter at fakkeltoget som gjekk frå kyrkja, hadde nådd torget. Samkoma vart leia av leiar Jahn Brattli Tolo i næringslaget, som samarbeider med fotballklubben om tilskipinga. Han retta ein særskild takk til dugnadsgjengen som har sytt for å få julelysa i sentrum på plass til advent.
Musikklaget spela, medan Lisa Grane Hisdal og Melinda Isabella Cao Zheng serverte fem songar til gangen rundt juletreet. Og så kom høgdepunktet: utdeling av papirposar med julemenn og ymse anna som snart var anten ete eller vasstrekt.
