Hydrogenvegen AS er tildelt 650.000 kroner frå Vestland fylkeskommune. Selskapet er eigt av Ullensvang, Kvinnherad og Notodden kommune.
– Dette er glimrande! Me aktar å utvikla industri- og miljøvegen vidare til også å bli «Hydrogenvegen», skriv ordførar i Ullensvang Roald Aga Haug, som også er styreleiar i Hydrogenvegen AS, i ein e-post til HF.
Han opplyser at verksemda er i dialog med bilbransjen for å visa potensialet ved å utvikla eit nettverk av hydrogenfyllestasjonar mellom aust og vest på europaveg 134.
Ullensvang kommune har dessutan søkt om stønad til hydrogensatsinga i kommunen frå den nasjonale stønadsordninga Klimasats.
– I Hardanger generelt og Odda spesielt er det stor interesse for bruk av hydrogen. Føremålet til Hydrogenvegen AS er å fremja bruken av hydrogen og alt som naturleg høyrer inn under dette. Selskapet skal bidra til at tilhøva vert lagde til rette, slik at det er mogleg å bruka hydrogen som drivstoff i desse kommunane, og for miljøvegen europaveg 134 mellom aust og vest. Målet er å legga til rette for bygging av hydrogenstasjonar i desse kommunane, og at kommunane, næringslivet og private kan delta i felles innkjøp av hydrogenkøyretøy, heiter det i søknaden til Miljødirektoratet.
Budsjettet til Hydrogenvegen AS er på 1,28 millionar kroner. I tillegg til den fylkeskommunale stønaden legg NIO til grunn 150.000 kroner i kommunal stønad, 50.000 kroner frå Hardangerrådet, 350.000 kroner frå «andre» og 80.000 kroner i eigeninnsats.
