Til Nordkapp i kamuflasjedrakt

Det er ein gammal militær Mercedes Geländewagen dei to blada Byrkjeland set seg i når dei laurdag morgon startar turen mot Nordkapp. Køyene er i eit telt som vert slege ut på taket, så slepp ein unna både småkryp og ormar. Teltet er laga for tre, så her vert det romsleg.

– Me treng ikkje noka campingvogn. Me har det som plomma i egget her. Og så kan me sitta under her og eta frukost, seier Bjørn.

Bilen vart kjøpt av ein privat kar som hadde kjøpt han av Forsvaret.

– Det er dei beste feltvognene dei har hatt i Forsvaret, seier Bjørn.

Vegmuseum og fisketur

Turen tek tre veker opp og ned. Totalt 12 bilar som er med i Historisk Militær Kjøretøyforening, (HMK) skal køyra i kolonne gjennom landet.

– Det er første gong me er der nord, men me har alltid hatt lyst å reisa dit. Det er kjekt å finna på litt andre ting. Andre reiser med campingvogn. Me har denne, seier Frank.

Før dei er framme i nord, skal dei mellom anna innom vegmuseet på Lillehammer, ut på ei fiskeskøyte i Lofoten og innom og grilla hjå folk langs vegen.

Det er ikkje første gong Bjørn reiser på tur med HMK. Ein gong gjekk turen til England. I fjor var bilane til Normandie på 75-årsjubileet til D-dagen.

– Det var ein fantastisk tur. Det er kjekt å reisa og å treffa andre, og å finna på noko som andre ikkje gjer, seier Bjørn.

God unnskyldning

Han fortel at han kjøpte bilen til turen til Nord-Noreg. Det vart billegare med diesel.

– Eg har alltid hatt lyst på ein, men turen er ei god unnskyldning, seier han.

Frå før har han mellom anna ein Ford GPW frå 1942, då Henry Ford måtte stoppa den kommersielle produksjonen for å hjelpa det amerikanske forsvaret. Også den bilen har vore med på mykje løye, seier Bjørn.

Frank deler hobbyen til faren. Sjølv har han gått til innkjøp av ein «kvarting», ein Dodge 3/4 ton truck. Det kom eit tips om at bilen hadde stått i Skånevik i sju år. Han kosta 5.000 kroner og tok to vintrar å setja i stand. Sidan har han vore mykje på tur.