Oppdagar Noreg på motorsykkel
Sveitsiske Ernest Pfammatter (65) har hatt mange eksotiske eventyr på motorsykkelen sin. I år tok han turen til Noreg for fyrste gong.
Det var ein regnfull dag då HF trefte Pfammatter og motorsykkelen hans på ferja frå Jondal. Han hadde planar om å stoppa på ein campingplass og søkja ly. Staden var full, så sveitsaren måtte susa vidare over fjorden.
Han reiser åleine og trivst med det. Ifølgje 65-åringen er det godt å vera for seg sjølv inni mellom.
– Enkelte seier at den beste måten å reisa på, er åleine, fortel Pfammatter.
Han har køyrt motorsykkel sidan han var 18 år. Køyretøyet har vore med på månad-lange ferder i mellom anna Australia, New Zealand, India og Amerika. 65-åringen fortel at han har besøkt India ti gongar og fått mange gode vener der.
Fotograf i farta
I tillegg til å køyra motorsykkel likar han å gå i fjellet og å ta bilete. Fotoutstyret ligg alltid lett tilgjengeleg i bagasjen, klart til bruk om han får auga på noko spesielt.
– Når ein fotograferer, er det best å vera åleine. Då er det lett å stoppa om ein plutseleg oppdagar bra lys eller fine motiv, fortel Pfammatter.
Sveitsaren synest det er stor forskjell på å køyra med motorsykkel i forhold til bil. På motorsykkelen er ein ute i frisk luft, ifølgje han. Vêret vert forsterka — ein kjenner sola varmar og merkar regnet som auser ned.
– Når det er fint vêr, kan ein ta det med ro og køyra med visiret oppe. Det er som å gå! fortel Pfammatter.
Han har vorte fortald at Noreg er det finaste landet i verda, på grunn av det karakteristiske landskapet. Sveitsaren er for så vidt einig i det, men synest alt er litt dyrt.
Trass litt nedbør er Pfammatter glad for å vera i Hardanger. Han har med seg eit stort, vasstett telt, campingstol og utstyr til å laga mat sjølv. Det går mykje ris, bønner og salat. Av og til unner han seg ein tur på restaurant.
Vêrhardt
65-åringen fortel at det viktigaste før ein motorsykkelferie er å vera godt førebudd. Ein må ha med skikkeleg utstyr og forsikra seg om at køyretøyet er i topp stand.
– Eg har på meg mange lag med klede for å kjempa mot regnet, humrar sveitsaren.
Han har høyrt om ordtaket «det finst ikkje dårleg vêr, berre dårlege klede» og tykkjer det er passande for noregsturen. 65-åringen reiste frå Sveits i midten av juni. Han bruka god tid gjennom Tyskland, Danmark og Sverige, og skal vera i Noreg fram til august.
Så langt har han gått til både Preikestolen og Trolltunga. Pfammatter synest Noreg er eit flott land og vil gjerne ta med kjærasten på neste tur. Då køyrer dei truleg bil, legg han til.
