Nordmenn ønskjer strengare reglar for fritidsferdsel på sjøen

Så mange som sju av ti nordmenn meiner det bør innførast strengare reglar for vasskuterar, slik som fartsgrenser eller avgrensa ferdsel i verneområde. Fleire enn seks av ti ønskjer seg det same for fritidsbåtar.

Det går fram av ei gransking Ipsos har gjennomført for Norsk Friluftsliv.

Generalsekretæren i Norsk Friluftsliv, Bente Lier, er ikkje overraska over tala. Også ho meiner regelverket bør bli strengare.

– Trafikkbiletet har vorte betydeleg endra berre på nokre få tiår. Med stadig fleire fritidsfartøy med høg fart, er det stille og rolege sjølivet komme under press. Alle skal kunne kjenne seg trygge på sjøen, og slik er det dessverre ikkje i dag, seier Lier i ei pressemelding.

Frå 1. juni 2023 blir innført eit krav om høgfartsbevis for å kunne køyre fritidsbåtar og vasskuterar som kan gå i 50 knop eller meir.

Norsk Friluftsliv meiner ei styrking av regelverket er positivt, men at grensa er sett så høgt at det får lite å seie for den reelle tryggleiken til folk som ferdast på sjøen.

– Med denne lovendringa kan det kanskje sjå ut som at regjeringa verkeleg styrkjer regelverket. Men når avgrensinga først gjeld for båtar som er oppe i svimlande 90 kilometer i timen, vil det i praksis ha lite å seie, seier Lier.

Norsk Friluftsliv meiner grensa for høgfartsbevis bør setjast ved 30 knop.

(©NPK)