– Lett å jukse i norske bomstasjonar

Med ein bombrikke for elbil plassert i frontruta kan ein passere norske bomstasjonar med diesel- og bensinbil, men likevel berre betale elbiltakst.

Det dokumenterer Motor i ein reportasje fredag. Motor skriv at dei brukte bombrikke for elbil i ein fossilbil i éi veke, og passerte bomstasjonar fleire stader på Austlandet.

I Oslo kostar det 75 kroner å køyre med dieselbil inn og ut av bomringane rundt byen i rushtida. Elbilar betaler som oftast ikkje noko i dei meir enn 300 bomstasjonane her i landet, i nokre ein brøkdel av takstane for bensin- og dieselbilar.

Vegdirektoratet og Statens vegvesen har i mange år visst om svakheitene ved bompengeinnkrevjinga. Dei eig Autopass, som er innkrevjingssystemet bompengeselskapa bruker.

Verken Autopass eller bompengeselskapa fører jamleg kontroll med kva biltype som bruker kva brikke. Autopass håpar dei å ha eit nytt datasystem på plass i 2021.

Direktør Stig Skjøstad i NAF krev at samferdselsstyresmaktene ryddar opp.

– Vegdirektoratet må rydde opp med éin gong. Bompengesystemet må vere vasstett mot misbruk, seier han.

NAF-direktøren ber òg bilistane la vere å prøve å jukse inntil vegvesenet får fjerna moglegheita til det.

(©NPK)