Foreslår felles standard for ladestasjonar og fyllestasjonar
Regjeringa foreslår at ladestasjonar og fyllestasjonar for hydrogen- og naturgass skal byggjast ut med standardar som er like i EU- og EØS-landa.
– Å redusere klimagassutsleppa våre er ein av dei største utfordringane no. Skal vi nå måla om utsleppsreduksjon, må transportsektoren bli grønare. Regjeringa foreslår at ladestasjonar og fyllestasjonar for hydrogen- og naturgass skal byggjast ut med standardar som er like i EU- og EØS-landa. Harmoniserte standardar kan leggje til rette for rimelegare utbygging, og dermed betre tilgjengelegheit og marknadsvilkår for bruk av desse drivstoffa i ulike køyretøy, seier samferdsleminister Knut Arild Hareide i ei pressemelding.
Regjeringa meiner ein felles standar kan styrkje konkurransekrafta til alternativt drivstoff for køyretøy.
Samferdsledepartementet har no lagt fram forslag til lov om infrastruktur for alternativt drivstoff. Dersom Stortinget vedtek den nye lova før sommaren, tek departementet sikte på at nye forskrifter skal vere gjeldande frå januar 2021.
(©NPK)
