Åtvarar mot å utsetja EU-kontrollen

Viss altfor mange vel å utsetja naudsynt vedlikehald og reparasjonar, vil det i slutten av mai verta lange ventelister hjå bilverkstadene. Dei har ikkje kapasitet til å ta titusenvis av ekstra kontrollar om ein månad.

Leif Gjerde ved Øystese Mek. Verkstad AS stadfestar at fleire utset EU-kontrollen enn vanleg.

– Det vert ei kritisk opphoping viss alle utset han. Det er ikkje ekstremt enno, men det er nok ein del som utset det. Det som kan verta ei krise, er viss mange skal kontrollerast i ferietida. Me sender ut innkalling til påminning om fristen, som normalt. Oppmodinga til bilistane må vera at dei tek EU-kontrollen når dei opphavleg skulle ha teke han, seier Gjerde.

– Må gjerast uansett

Biltilsynet er ute og fotograferer bilskilt. Viss ein ikkje har utført kontrollen innan rett tid, ut over den ekstra fristen, og vert teken, så er det ikkje noko slingringsmonn. Då er det av med skilta, og du får ikkje lov å køyra lenger.

– Det er ei dårleg oppleving som ein kan få om ein ferierer i Noreg, slik dei fleste skal. Du må betala 1.500 kroner for å få skiltet att. I tillegg må du få prøveskilt eller bilberging, seier Gjerde.

– Vår oppmoding er å ta kontrollen til rett tid. Det må gjerast uansett. Er folk i ein vanskeleg situasjon, så har dei no fått høve til å utsetja det. Men dess lenger det går, dess verre kan ein feil vera, seier dagleg leiar ved Toyota Norheimsund, Svein Hogne Børven.

– Viss folk ottast å verta smitta av koronaviruset, så skal dei vita at me fylgjer retningslinene og vel så det, seier han.

– Lever bil som vanleg

Verksmeister i same verksemd, Jostein Solberg, seier det er i dag vanskeleg å svara på kor mange som utset kontrollen. Han lyt sjå kor mange som kjem i slutten av mai og i juni.

– Me har ikkje merka noko til det enno, seier han.

Verksemda kjem til å ha folk i arbeid heile tida, men redusert kapasitet i ferien. Verksmeisteren oppmodar folk til å koma med bilane som vanleg. Viss ein ventar for lenge, risikerer ein å ikkje få gjort kontrollen før fristen går ut.

Spesielt for dette året er at fleire enn vanleg vil bruka bilen i ferien. Sannsynlegvis kan ein ikkje ta utanlandsturar som vanleg. Viss folk ventar med EU-kontroll og vedlikehald av bilane til like før dei skal reisa, i slutten på mai og i juni, vil det verta kapasitetsproblem, opplyser Solberg.

– Biltilsynet er firkanta

Statens vegvesen varslar om kontrollfristen berre på Altinn, to månader før bilen skal vera godkjend. Viss du skulle hatt bilen inne i april, så fekk du melding i februar. Er ikkje bilen godkjend før mai, får du eit brev der det står at bilen ikkje er godkjend og er kravd avskilta. Det er ikkje som før, då du kunne få to månader ekstra viss du gløymde deg. Difor er det viktig å retta seg etter fristen.

– Det hjelper heller ikkje å seia at «eg tinga kontroll to dagar før fristen gjekk ut, men verkstaden har ikkje tid før om to veker». Det er ikkje god nok grunn til å få ei utsetting frå Biltilsynet. Dei er litt firkanta der, seier Solberg.

Tidlegare var det det siste sifferet i registreringsnummeret som avgjorde når du skulle inn til kontroll. Det har ein stort sett gått bort frå. Viss bilen er godkjend i april, får du godkjenning for to nye år, og april vert kontrollmånaden. Den fyrste kontrollen er fire år etter registreringsdato, deretter annakvart år.

– Verkstadene er opne og opererer med svært låg smitterisiko. Det er ingen grunn til å utsetja EU-kontrollen viss du ikkje er sjuk eller i karantene, seier Tor Simonsen, bransjefagleg leiar i Norges Bilbransjeforening (NBF).

Å venta med kontrollen kan føra til at folk risikerer å ikkje ha tilgang til trygge bilar i ein lenger periode.

– Men det er heilt uturvande. Verkstadane har kapasitet, og det er trygt, seier Simonsen.

Både statsministeren og helseministeren har poengtert at alt som kan fungera som normalt, bør fungera som normalt, påpeikar NBF. Bilbransjen kan operera som normalt, berre det kjem kundar.