– 170 kilometer i timen på grus

Løpet på Eikås Motorsportsenter laurdag var finale i vestlandsmeisterskapet, som Måge vann i fjor. I år har han ikkje delteke.

– Det har ikkje gått heilt etter planen, seier han.

Han siktar til at bilen ikkje vart løpsklar i tide. Fyrst sende Måge motoren til Sverige på service. Deretter måtte heile bilen til Sverige. Bilen vart ståande der lenge, og då var både det fyrste og det andre løpet i meisterskapet ferdig. Det tek tid å venja seg til nye bremsar, demparar og styring, fortel Måge. Difor ser han på dette som eit treningsår. 2.-plassen i helga var difor ein opptur.

– Med tanke på at eg har sete i bilen berre tre gonger i år, var me veldig godt nøgde. Han som vann, leiar årets noregsmeisterskap i rallycross, så det var bra at me klarte å halda følgje med han, seier Måge.

Måge seier «me», og tenkjer då på dei tre medhjelparane Morten Haugen, Erling Solberg og Arve Steinstø. Haugen og Solberg er mekanikarar, medan Steinstø er spottar. Det vil seia at Steinstø har oversyn over heile banen under løpet, og fortel Måge via radio kor mange rundar han har køyrt og hjelper til med taktikken undervegs.

Direkte til A-finale

Ti bilar deltok i rallycross på Eikås Motorsportsenter laurdag. Alle bilane køyrer fire innleiande løp med 3,75 rundar. Dei beste frå kvart heat får dei beste startposisjonane til det neste heatet. Måge fortel at dersom ein køyrer godt i alle dei fire, får ein direkte plass i A-finalen slik han gjorde. Dei andre bilane møter kvarandre i B-finalen. Dei to beste frå B-finalen køyrer seg inn i A-finalen, slik at seks bilar står på startstreken.

Bilane i kvart løp startar samtidig, men det er ikkje så ofte dei kjem likt i mål, sjølv om det skil berre få sekund. Ifylgje Måge er det ein fordel å ha startspor nummer éin eller to i Bergen, sidan ein då byrjar med innersving og får kortare veg. I finalen starta han i tredje spor.

Ein gong i løpet må alle bilane innom det som vert kalla det alternative sporet eller jokersporet. Ein del av jobben til Steinstø er å planleggja når Måge skal innom der. Rallycrossføraren seier små feil kan gje store utslag for resultatet.

– Det handlar om timing

Måge tevlar i klassen Rallycross Supernational. Denne er delt i fire klassar, etter kor stor motor bilane har. Motoren til Måge har eit volum på 2,4 liter, og difor tevlar han i klasse 3, den nest øvste. Dei som tevlar i klasse 4, har endå raskare bilar.

– På strekkja køyrer eg 170 kilometer i timen på grus. Det vert på ein måte ein sladd oppover bakken, seier Måge.

Han vert ikkje redd. Ein må gløyma at det kan gå gale og kva det kostar, seier han. Måge har ikkje hatt ei einaste treningsøkt i bilen i år, men han har delteke i tre løp. Det viktigaste for å lukkast er å setja opp bilen etter banen, seier han. Det betyr at demparane må justerast riktig, og ein må velja dei rette dekka for den aktuelle banen.

– Er du god til å setja opp bilen, kan du køyra fort. Det handlar mykje om timing. Ein kan henta mykje i inn- og utgangar i svingane, seier Måge.

I tevlinga på Eikås køyrer bilar frå ulike klassar mot kvarandre, slik at ein skal sleppa å køyra åleine dersom ein er åleine i klassen. Det betyr at ein i teorien kan vinna klassen ved å vera nummer tre i mål i finalen.

– Alt kjekt er dyrt

Kona Kristina og dottera Ada er viktige støttespelarar for Måge. Dei reiser land og strand for å fylgja med på billøpa. Bilføraren understrekar at han ikkje kunne ha drive med rallycross utan familien.

Blant tilskodarane laurdag såg Måge fleire kvemmingar. Det set han stor pris på. Fleire av sponsorane var òg på plass, og fekk ein kaffikopp i teltet til Måge. For å driva med rallycross, er han avhengig av økonomisk støtte.

– Det kan ikkje stå i avisa kor mykje eg har brukt på bilen. Då vil folk tru eg er galen, men det kostar så mange hundre tusen å starta opp at ein er avhengig av å ha nok midlar. Dekk, blant anna, er veldig dyrt. Alt kjekt er dyrt, seier Måge og ler.

I fjor vann Måge både vestlandsmeisterskapet og bergensmeisterskapet. Sjølv om det ikkje har gått som planlagt i år, håpar han å tevla meir neste år. Før årets sesong vert avslutta, skal Måge køyra eit klubbløp i Vikedal neste helg og eitt løp i Bergen 5. oktober.