Tenkjer du på å renovera badet? La deg inspirera av Jannie sitt oppussingsprosjekt.

Jannie Nielsen hadde ein draum om å flytta klesvasken ut av badet. Etter nokre månader med planlegging og byggjesjau er draumen realisert. Tecno VVS har laga eit nytt bad som er tilpassa ein travel familie på fem. I tillegg er rommet vorte ein stad for ro og avkopling.

Baderomsdesignar Emmy Charlotte Selsvik Røberg har rettleia Jannie i val av stil og fargar. Prosjektleiar og tømrar Tore Bråten har sytt for at badet er tett. Det gamle badet er slege saman med eit soverom og forvandla til eit større bad og eit vaskerom. Vaskemaskin og tørketrommel er omsider forviste frå badet.

Vegen til eit nytt bad

Me sit i den nye utestova til Jannie og drikk kaffi og gomlar Twist. Me har vore her før for å filma og ta bilete undervegs i renoveringsprosjektet. No er badet ferdig og teke i bruk, og me lurer på om Jannie er nøgd med resultatet og kva erfaringar Emmy og Tore har gjort seg.

Zoom Førre Neste

– Kvifor ville du pussa opp badet?

– Det var så mange grunnar. Badet var rett og slett utdatert og dessutan «pittelite». Det var for lite til ein familie på fem og ikkje funksjonelt. Vaskemaskin og tørketrommel var på same rommet, og logistikken på badet fungerte ikkje i kvardagen.

Jannie hadde nokre tankar om korleis ho ville at badet skulle sjå ut før ho tok kontakt med Tecno VVS, men trong hjelp til å finna fargar og materialar som passa saman.

– Det var jo difor eg gjekk til Emmy. Eg sa: «No har me bestemt oss for at me vil renovera badet. No må eg ha hjelp med utforminga.»

Det viktigaste for Jannie var å skilja bad og vaskerom.

Zoom Førre Neste

– Eg kunne godt ha tenkt meg å ha heile rommet til eit stort, flott bad, men det var rett og slett fornuftig og praktisk å dela det opp og heller få eit lite vaskerom, men i alle fall kvar for seg, seier ho.

Dessutan stod badekar høgt på ynskelista.

– Ja, badekar var på topp, og større dusj og større vask. Rett og slett større plass til å flytta seg rundt på. Det er godt å ha armslag, i alle fall når ungane er så små som dei er no.

Etter at badet er teke i bruk, er ikkje Jannie i tvil om at det er badekaret som er den mest populære oppgraderinga både for liten og stor. Det er like før det kjem opp ei liste på baderomsdøra med fordeling av «badekartid».

– Badekaret er jo heilt himmelsk! Ungane er like begeistra som meg. Dersom dei ser at eg skal bruka det, vil dei òg og stiller seg nærast i kø.

I tillegg til badekaret er større dusj og to servantar eit merkbart pluss. Jannie har òg plass til alt «pøet» i nye skuffer og skap.

– Eg må bu meg litt inn og har ikkje heilt bestemt korleis eg vil organisera alt, men funksjonaliteten er heilt ypparleg. No er det plass til alt. Kanskje det vert plass til litt for mykje rot. Og det at me kan vera fleire på badet samstundes og pussa tenner og slikt, er ein føremon.

10 års garanti

Tore Bråten har bygd mange bad etter kvart. Sjølv om Jannie sitt bad er avansert, skil det seg ikkje vesentleg frå andre bad. Måten ein byggjer på, er i praksis den same.

– Det er same rivinga og same oppbygginga, og det er stort sett kjende overflater og teknikkar me held på med, seier Tore.

Likevel møtte Tore på ei ny utfordring i arbeidet med badet til Jannie.

– Spileplatene var ei ny erfaring. Det har me ikkje brukt før. Dei har me berre sett på bilete, og det var ei utfordring å finna spiler som toler damptrykket på eit våtrom.

Etter å ha saumfare Vestlandet for leverandørar som kunne gå god for at spilene ville tola damptrykket på eit bad over lengre tid, fann Tore ei løysing. Spilene som er nytta på badet til Jannie, har to lag med kvitpigmentert lakk og er monterte på veggen i hjørnet bak badekaret.

– Desse er godkjende for damptrykk. Det er veldig viktig å presisera. Du kan ikkje dusja på dei. Dei er ikkje vassbestandige, men dei toler damptrykket. Bak spilene er det eit vasstett sjikt, forklarer Tore.

Zoom Førre Neste

For at Tecno skal kunna gje 10 års garanti på badet, må dei ha hand om heile byggjeprosessen. Røyrleggjar- og tømrararbeidet er utført av Tecno. Norheimsund Elektro tek seg av det elektriske, og Bjarne Fonneland er fliseeksperten. Begge er godkjende leverandørar for tiårsgarantien. Alt av membranar og overgangar må takast bilete av undervegs. All dokumentasjon vert lasta opp til Bademiljø, som godkjenner til slutt. Bilete og tekniske teikningar vert lagra i Boligmappa. Dersom badet skulle visa seg å ikkje vera tett, så er det Bademiljø som står for garantien og tek kostnaden med å utbetra.

– Me kan ikkje laga halvgode løysingar. Alt må gjerast skikkeleg, seier Emmy.

– No kan me feira jul på badet!

Etter at fliselim og spikarpistol er rydda vekk og handverkarane har forlate huset, er det tid for å evaluera.

– Kva er du mest nøgd med?

– Kor fint det er blitt. Stilen på badet, rett og slett. Før var det eit augesår. No har eg lyst til å visa det fram. Eg synest det er kjekt når det skjer ting. Huset er frå 1968, og det er ikkje gjort så mykje med etter det. For kvart prosjekt så tenkjer eg: «Å kor deileg! No har eg lyst til å invitera folk heim, seier Jannie.»

– No kan me feira jul på badet!

Zoom Førre Neste

Gjennomtenkt er bra tenkt

Dersom Jannie skulle ha gjort noko annleis, er det å førebu seg litt meir før ho tok kontakt med Tecno VVS.

– Det er nok mange tankar eg kunne gjort meg før eg tok kontakt med Emmy. Eg kunne ha lese litt meir, sett litt meir på Pinterest og funne meir informasjon, slik at eg hadde hatt klarare tankar om kva eg eigentleg hadde lyst på. Det er jo så mange alternativ, og det er så vanskeleg å velja. Eg likar jo alt.

Det er mange val når ein skal pussa opp eller byggja nytt, og det kan vera vanskeleg å bestemma seg for kva ein vil ha. For at resultatet skal verta best mogeleg, er det lurt å ha tenkt gjennom dei grove trekka. Emmy understrekar at det er ikkje alt som let seg gjera, sjølv om Tecno fiksar det meste.

Zoom Førre Neste

– Eg synest Jannie sa det fint. Kanskje ein må tenkja seg endå litt meir om før ein set i gang. For det er ein jungel å leita i, og alt er fint på sin måte, men ein må finna ut kva det eigentleg er ein ser for seg? Kva fargar vil eg ha? Kva uttrykk vil eg ha? Kva funksjonar skal badet ha, og er det mogeleg å gjennomføra? Ting ser så fine og flotte ut, og så er det ikkje alltid at me kan gå god for det. Det er jo nokon som vert veldig skuffa om dei ikkje kan få dei spilene inne i dusjen, seier Emmy.

Jannie synest det vanskelegaste har vore å finna den rette stilen, og då har Emmy vore god å ha.

– Emmy har hjelpt meg med å sjå kva som fungerer i lag. Skulle eg ha gjort alt sjølv, måtte eg sikkert ha bygd fem bad. Difor var det greitt å nytta Tecno VVS sin ekspertise. Nokon som faktisk veit kva som er lurt å gjera og som har gjort det mange gonger før. Emmy har gjort dette dei fem gongene eg skulle ha gjort det sjølv.