Ny bruktbilhall vart til ny nybilhall

Er du nyfiken på den nye bilhallen til ØMV Bilsenter på Lundanes? No opnar dei dørene og ynskjer alle velkomne til ein triveleg bilprat. Christoffer Gjerde har dessutan ei nyheit som vil gle elbilfrelste kvemmingar: Det kjem eit nytt bilmerke til Kvam.

Det som eigentleg skulle verta ein rein bruktbilhall, viste seg å passa betre til nye bilar. Om lag 500 kvadratmeter gjev plass til 15–18 doningar, alt etter kor tett ein plasserer dei. Bygget er moderne innreitt. Det er éin ladestasjon for elbil inne i hallen og to utanfor. Taket er dekt med solceller. Gjerde fortel at då bygget vart teikna, var miljøomsynet ein viktig del av prosjektet.

– Me skal ikkje gløyma bruktbilane. Dei er no plasserte rundt nybygget. I tillegg kjem det til å stå nokre bilar inne i hallen. Kundemottak for verkstad, karosseri og delelager vert verande der det er, men eg har flytta med nybilane til nybygget, fortel Gjerde.

Her har han eit romsleg kontor bakarst i lokalet.

I den nye bilutstillinga er det ei sitjegruppe der kundar som ventar på bilar som er på sørvis eller liknande, kan slappa av med ein kopp kaffi og kikka på nye bilar.

BYD – no også i Kvam

– Til no har me hatt éin elektrisk bil i sortimentet vårt, og det er Ford Mustang Mach-E. Det er ein fantastisk bil, og me har selt mykje av den. Med Suzuki kan me også tilby hybridmodellar med firhjulstrekk. Men me har vore interesserte i å utvida sortimentet vårt, slik at me kan dekkja behova til endå fleire kundar. Difor er me no glade for å kunngjera at me har inngått avtale med eit bilmerke til og vert merkeforhandlar av BYD, seier Gjerde.

BYD har spesialisert seg på elektriske bilar, og er verdas fyrste bilprodusent som har full ekspertise med tanke på eigen produksjon av batteri, elektriske motorar og elektriske kontrollar. BYD er eit teknologiselskap, som har utvikla seg til også å verta ein bilprodusent.

Tilsette ved ØMV har testa bilane og snakka med fleire BYD-forhandlarar, som alle er nøgde med bilmerket. Den fyrste personbilen lansert i Noreg er heilelektriske BYD Tang. Det er ein SUV med sju sete, firhjulstrekk, god rekkjevidde, hengarvekt opptil 1.500 kilo og med moglegheit for taklast. BYD har også ein elektrisk varebil, BYD T3.

– På bygda går det gjerne litt rykte, og me har faktisk selt eit par BYD Tang før me offisielt vart forhandlar av BYD. I tillegg til dei to modellane som er lanserte i Noreg, kjem det to heilt nye heilelektriske modellar. Den eine er ein kompakt SUV og den andre ein mellomstor sedan. Best av alt er at dette er bilar som kjem allereie i år. Så det er spanande tider i vente, fortel Gjerde.

Ford er òg i siget

Ford har investert i elektrifisering og kjem med mykje spanande i løpet av dei neste to åra.

– Per no har me Mustang Mach-E, og så kjem det ein stor varebil i Ford Transit 2T. Til neste år kjem dei med ein varebil til, heilelektriske Ford Custom. Dessutan får me Ford Puma som elektrisk bil, og så kjem Ford med to mellomstore SUV-ar innan 2024, tippar Gjerde.

80–90 prosent av nybilsalet i personbilsegmentet er elektriske bilar, fortel Gjerde. Han er ikkje i tvil om at det er elbilar som er framtida.

– Kva synest du personleg om elektriske bilar?

– Dei er heilt topp! Eg har hatt ein Ford Mustang Mach E sidan i fjor, og har testa den i vel eitt år. Bilen er utruleg behageleg å køyra og har svært god rekkjevidde. No har me vore på bilferie i Noreg dei siste to sommarferiane, og «rekkjeviddeangst» har eg ikkje kjent på. Ladenettverket vert betre og betre utbygd. Dei få gongene bilen har hatt behov for hurtiglading, har han vore ferdig lada før me har vore klare til å køyra vidare. Elles har me stort sett lada bilen heime. Så elbil er heilt fantastisk, konstaterer Gjerde.

Frå «mekking» til PC

Kjell Henning Berge har jobba ved ØMV Bilsenter i fleire omgangar, og er no tilbake i bedrifta som service- og marknadssjef. Han byrja i stillinga 1. mars i år og er ansvarleg leiar for verkstaddrifta, både for mekanisk og karosseri. I tillegg er det to verksmeistrar, Bjørn Olav Torpe på mekanisk og Geir Arne Fasteland på karosseri og lakk.

– Men me overlappar sjølvsagt kvarandre. Ambisjonen vår er å vera eit komplett bilsenter der me reparerer alle bilmerke. Hovudvekta ligg på Ford og Suzuki, som er merkeleverandørane våre, og med nysatsinga frå BYD vert det eit endå betre tilbod, seier Berge.

Med ein stab på fire–fem mekanikarar og seks–sju opprettarar er det ein del folk i sving ved verkstaden til ØMV. Jamleg kursing og kompetanseheving er viktig for bedrifta.

– Det er ei rivande utvikling. Det skjer noko heile tida. Bilfaget har endra seg, spesielt innan det mekaniske. Det er elektrifisering som gjeld, for å seia det slik. Det som framleis er det same, er arbeid med bremsar, forstilling, understell og klimaanlegg. Elles snakkar ein no om diagnose, feilsøking og oppdateringar, fortel Berge.

Mykje av arbeidet vert no utført med hjelp av ei datamaskin eller diagnosemaskin.

– Skulen heng nok litt etter, så kurs hos importørar og kjede-

tilslutning er særs viktig. Ein er heilt avhengig av lærlingar og læreplassar. Det er i arbeidslivet ein får erfaring i korleis ein reparerer elektrisk drivne bilar. Så bilfaget bør absolutt appellera til ungdom som er interessert i teknologi og data, seier Berge.

Og kva tykkjer Berge sjølv om elbilar?

– Eg har køyrt fossilt fram til eg byrja her, men har vorte positivt overraska over elbil.

– Ingen rekkjeviddeangst?

– Nei! Då må eg sitera eit uttrykk eg har lese: Lad når du kan og ikkje når du må! Har ein det i bakhovudet, så fungerer elbil heilt topp. Det er berre å leggja om vanane litt.