Industrien i Sandvenhagen er til sals
Er du på jakt etter eit eigedomsprosjekt med potensial? Industrien er ein ideell plass for verksemder og føretak som ynskjer ei strategisk plassering nær naturen og samstundes tilgang til gode fasilitetar.
Industrien i Sandvenhagen er eit moderne næringsbygg som ligg på Moflaten i Steinsdalen. Sidan den eldste delen vart bygd i 1992, har staden vore ein sentral del av det lokale næringslivet. I 2009 vart bygningen bygd på. Han har i dag eit areal på 4.920 kvadratmeter.
Kvifor sal?
Sandvenhagen AS kjøpte Industrien i 2017 og overtok i 2018. Styremedlem René Sæthre fortel at målet var å vidareutvikla eigedomen, og dei siste åra er det gjort omfattande vedlikehald av bygningen.
– Det var ein del etterslep på vedlikehaldet som no er teke unna. Utgangspunktet vårt var å føra Steinsdalsvegen 104 attende til opphavleg god stand, seier Sæthre.
Selskapet ynskjer no å selja eigedomen. Nye prosjekt ventar.
– Nye eigarar kan halda fram med trygg drift av bygningsmassen, og eigedomen har framleis potensial, seier Sæthre, som håpar å selja til lokale investorar.
Sæthre synest entreprenørskapsånda i kommunen er sterk. Mange av dei som Sandvenhagen AS leiger ut til, er bygg- og anleggsbedrifter. Kanskje er det nokon i Kvam som leitar etter eigna næringslokale?
– Då er sjansen her no, seier Sæthre.
Sentral plassering og moderne komfort
Eigedomen er på om lag 10 mål og ligg like ved den oppløftande vårhelsinga som dukkar opp av bakken kvart år i form av påskeliljer. Eit årvisst særmerke dei fleste kvemmingar kjenner til.
Den nyaste delen av bygget vart ført opp i 2009, er i god teknisk stand og stettar krava til universell utforming. Det er heis mellom alle etasjar, handikaptoalett og seks ladestasjonar for elbilar. Alle tilsette har tilgang på treningsrom og garderobar med dusj. Det er ei moderne kantine i bygget som er ledig og klar for nye oppgåver.
Utbetringar dei siste åra
Sandvenhagen AS har gjort fleire utbetringar i bygget etter at dei tok over. Mellom anna har tak og fasade vore gjennom ei omfattande rehabilitering. Elles er det høgt under taket og god ventilasjon. Nyleg vart det investert i fornying av ST-styring, eit system som styrer lys, varme og ventilasjon automatisk.
40 arbeidsplassar
Det er om lag 40 arbeidsplassar i bygget. Mellom leigetakarane er offentlege etatar som Kvam politistasjon og tingretten, men også private bygg- og anleggsbedrifter er å finna.
Byggjevareleverandøren Montér har vareutsal og lager i 1. etasje. Norhand har produksjonslokale, butikk, lager og kontor. I tillegg disponerer dei ein hall som er 14 meter høg. Her har Norhand eit automatisert logistikksystem som finn og hentar delar. Bygg’da og Johan Skeie AS held til i kontorfellesskapet i 2. og 3. etasje.
– Totalt kjem leigeinntektene på om lag 4,3 millionar kroner i året, og det er plass til fleire leigetakarar, fortel Sæthre.
Det er om lag ti ledige kontorplassar som passar fint til eit mellomstort selskap eller til enkle plassar. Sandvenhagen AS leiger i dag ut enkle kontorplassar med tilgang til møterom og internett frå 3.000 kroner i månaden.
– For dei kundane som treng meir plass, er det enkelt å gjera naudsynte tilpassingar, seier Sæthre.