Har du eit oppussingsprosjekt på gang? Snakk med Anne Sissel på XL-BYGG, er Guro sitt råd.

Det er Guro Torpe og Ingunn Gule Langeland sitt råd. Begge har fått tenlege tips og god rettleiing om korleis ein best kan utnytta eit rom og om val av riktige materialar.

Ekspressrenovering

Guro Torpe og sambuaren har i løpet av sju månader fått nytt kjøkken og nye overflater i gang, stove og på soveromma. Med iherdig eigeninnsats, god hjelp frå familien, snikkarar og ikkje minst Anne Sissel Froastad på XL-BYGG er oppussingsprosjektet så å seia ferdig.

– Me byrja riva i slutten av april og ferdigstilte siste stova tre dagar før julaftan, fortel Guro. Koronatida har vore utnytta til å planleggja, riva, måla og snikra. På berre sju månader har familien fått eit «nytt» hus. Attåt ny jobb og ein aktiv eittåring har det vore både travelt og kjekt.

Effektivt og miljøvenleg

Å handla lokalt er både tidseffektivt og miljøvenleg. På XL-BYGG er det berre å køyra innom og plukka med seg det ein treng.

– Heile familien har hjelpt til, og XL-BYGG har vore veldig raske med å finna løysingar. Det er veldig fint å handla lokalt. Då får du det du treng av material kjapt og slepp å køyra langt for å henta. Det kommenterte òg svigerfamilien min frå Austlandet som kom her for å hjelpa oss med oppussinga. Dei syntest det var vidunderleg med den korte avstanden til butikken og å sleppa kø, seier Guro.

Om det er større ting som skal transporterast, leiger XL-BYGG bil og sjåfør av transportfirmaet Jan Mo AS.

Huset i skogen

Guro og sambuaren overtok huset til besteforeldra til Guro i april 2020. Huset er frå 1975 og ligg i Fitjadalsvegen i Øystese. Det er lenge sidan førre vøla. Det unge paret ynskte difor ei fornying.

– Me kallar det berre huset i skogen, seier Guro.

No er store delar av huset pussa opp, og nokre av romma er totalrenoverte. Det meste av materialar har dei handla hjå XL-BYGG, men sjølve jobben har dei teke hand om sjølve. Guro er svært tilfreds med resultatet. Hadde det ikkje vore for rettleiing og gode tips frå Anne Sissel, hadde det ikkje vorte like bra. Hennar innspel om plassering av vindauge og val av dører vart tekne til følgje.

– Hadde de ein plan før de starta oppussingsprosjektet?

– Me var opne for forslag om korleis me kunne gjera det. Det heile byrja eigentleg med kjøkkenet. Me hadde fått teikna kjøkken både på Ikea og Epok, men så var me innom her til Anne Sissel, for sjå på eit Sigdal-kjøkken. Ho hadde veldig gode løysingar for kjøkkenet. Ho var til og med på heimebesøk to gonger. Samstundes som ho såg på kjøkkenet, såg ho på plassering av vindauge og dører og hadde nokre tips som me fall for. Me hadde eigentleg sett for oss noko anna, men me gjekk for Anne Sissel sitt forslag, og det er me veldig glade for. Når me fekk denne sørvisen, freista det veldig å bruka dei vidare, seier Guro.

Zoom Førre Neste

Og slik vart det. Det eine førte til det andre, og XL-BYGG har vore fast leverandør og rådgjevar gjennom heile prosjektet.

– No har me sagt oss ferdige, men eg trur eg sa det ein gong i haust òg. No ser me på garderobar, og me er innom her støtt og stadig, seier Guro og ler.

Lokalt, trygt og godt

Ingunn Gule Langeland skal byta golv i stova. Ho har fått låna med seg ulike golvprøvar heim, og etter drøftingar med fleire husstandsmedlemer er valet teke. Oppussingsprosjektet er i startgropa. Både garderobe og kjøkken skal fjelgast på lengre sikt, men i fyrste omgang er det tak, golv og vegger i stova som skal fornyast. Ingunn og Anne Sissel drøser om isbading medan golvet Ingunn har bestemt seg for, vert notert på blokka til Anne Sissel.

– Hadde du sett for deg noko på førehand?

– Nei, eigentleg ikkje så mykje. Eg er ikkje så glad i sjå på nettet eller i katalogar. Eg likar best å sjå ting «live».

Då er visningsrommet til XL-BYGG kjekt å ha. Det same er moglegheita til å kunna låna med seg prøvar heim.

Huset som Ingunn bur i, vart bygd på 70-talet. Delar av huset har vore renovert før, men no er det ny runde. Golvet er rive og ein svær peis i teglstein knust.

– Me har rive sjølve. Det me trudde skulle ta fem veker, tok fire dagar. Me har vore i karantene, og då gjekk det unna. Det var fram med brekkjarnet, og plutseleg var me utan stove, seier Ingunn.

I tillegg til om lag 50 kvadratmeter med golv har dei kjøpt vindauge og skyvedør hjå XL-BYGG.

– Me har flott utsikt som me skal gjera endå vidare, seier Ingunn.

– Kvifor handlar de hjå XL-BYGG?

– Fordi det er lokalt, trygt og godt, og me slepp å reisa langt. Her kan me få alt. Kjempeenkelt, slår Ingunn fast.

Visningsrom gjer jobben enklare

Anne Sissel er tilfreds med visningsrommet XL-BYGG fekk bygd for eit par år sidan.

– Det er veldig lett å jobba med kundane når dei kan vera her i ustillinga. Då skjønar kunden litt meir kva eg snakkar om. Eg kan visa korleis ting ser ut, fargar og detaljar på vindauge og listverk. Her kan ein ta og sjå produkta, seier ho.

Zoom Førre Neste

Anne Sissel har jobba i XL-BYGG i åtte år, men har snart vore 20 år i byggjebransjen. Ho er interiørkonsulent og teknisk teiknar.

– Det er kjekt å vera kreativ og finna løysingar for kjøkken og garderobar, men det kjekkaste er eigentleg å hjelpa ein kunde med ein heilskapspakke. Spesielt om eg kan tipsa om noko dei ikkje har tenkt på. Det å kjenna at ein kunde er nøgd, er veldig kjekt, seier Anne Sissel.

Ho har sjølv førstehandserfaring med å pussa opp.

– Det er lærerikt å halda på sjølv. Eg brukar ein del eigne erfaringar i jobben, fortel Anne Sissel.

Sel litt av alt

XL-BYGG sel litt av alt og støttar seg ikkje berre til èi varegruppe. Dei fører tak, golv, vegger, kjøkken, garderobar, omnar, måling og materialar. Det er mykje å halda styr på for Anne Sissel. Heldigvis er ho ikkje åleine. Reidun Berge Øvrehus og Silje Christine Fardal er òg med på laget. Reidun er butikkansvarleg og utdanna møbelsnikkar og båtbyggar. Silje er interiørkonsulent.

– I og med at me er små, må me som er her, kunna mykje. Me kan ikkje dela oss i ulike avdelingar. Det gjer det òg kjekt og utfordande å jobba her. Ein lærar noko nytt kvar dag. Det er alltid nokon som kjem med eit spørsmål ein ikkje har vore borti før, seier Anne Sissel.