H2 Hardanger er ei kvammaverksemd i vekst: – Ingen problem å bu i Kvam og jobba i heile verda!

I det firkantabygget som ligg bak Gullsmed Bjørgum i Norheimsund, held åtte bedrifter til. Bygget vert kalla Kassen og er eigd av Apal AS. Her har dei utvikla eit triveleg og nyttig kontorfellesskap.

Wenche Eide Skeie (36) byrja som kontorleiar i H2 1. mars 2020. Trass pandemien har arbeidsmengda auka, og H2 tek no opp mykje av arealet i Kassen sjølv. Wenche si sut for at ho var sistemann inn og dermed ville vera fyrstemann ut, har vist seg å vera unødvendig.

– Me hadde eit hårete mål om å vera ti tilsette innan eitt år. Det målet har me nådd, og me treng stadig nye lagspelarar, seier Wenche.

Olav Mikal Fykse (36) er det ferskaste tilskotet til staben i H2. Han byrja som prosjektleiar 1. februar 2021, men har vore ein del av kontorfellesskapet i fleire år. Før han tok steget over til H2, jobba han som avdelingsleiar for eit firma i Oslo, men hadde arbeidsplassen sin i Kassen.

– Me sat jo her i lag før òg, men det er endå meir gjevande å ha dei som kollegaer enn å berre vera i same bygg. Eg kjenner mange av dei frå før, og me har felles interesser også på fritida. Det er ein veldig triveleg gjeng, og det er kjekt å gå på jobb om morgonen, seier Olav Mikal.

Det neste målet er 20 tilsette innan fem år.

Både nær og fjern

H2 har mykje arbeid utanfor Kvam. Dei fleste prosjekta deira er i andre kommunar. Olav Mikal jobbar for tida med bedrifter som held til i Danmark, Bømlo og Bergen.

– Arbeidsoppgåvene er ikkje keisame sjølv om ein jobbar i Kvam, tvert om trur eg det er meir interessante arbeidsoppgåver i eit lite enn i eit stort firma. Det er ikkje noko problem å bu i Kvam og jobba i heile verda. Er du interessert i spannande arbeidsoppgåver i eit ungt miljø, ta kontakt eller send ein søknad! oppfordrar Olav Mikal.

Trivsel i fokus

Wenche er utdanna sjukepleiar og har tidlegare jobba som bedriftssjukepleiar og HMS-rådgjevar i Bedriftshelse1. I tillegg til administrative oppgåver og bistand i prosjekta har ho ansvar for HMS. Det inneber mellom anna å utvikla gode system for det organisatoriske og sosiale arbeidsmiljøet. Gode prosedyrar kan førebyggja og vera til hjelp for å handtera vanskelege situasjonar.

– Det hjelper ikkje med vaflar kvar fredag om me ikkje har det bra elles i veka. Me sit i ope kontorlandskap og jobbar tett saman om prosjekt. I tillegg har me fokus på å møtast til sosiale aktivitetar utanom arbeidstid. Då er det viktig at me trivst i lag, seier Wenche.

– Me er ein samansveisa gjeng, legg Olav Mikal til.

Fleksibel arbeidskvardag

Olav Mikal og Wenche set stor pris på fleksibiliteten dei har i arbeidskvardagen. Det gjer det enklare å få tidskabalen, som kan vera krevjande i ein småbarnsfamilie, til å gå opp.

– Det er mykje arbeid og travle dagar. Då er det til god hjelp å ha fridom til å styra eigen arbeidsdag. Det vinn både arbeidsgjevar og tilsette på, seier Wenche.

Olav Mikal er i same situasjon som Wenche, med små born heime, og er glad for fridomen han har til å styra eigen arbeidsdag. Det er eit ungt miljø i H2. Spennet i alder er frå 29 til 46 år. Det betyr òg at det er ein stor del av arbeidsstokken som har små born.

Olav Mikal gjev eit døme på korleis ein arbeidskvardag kan sjå ut.

– Eg skulle til Oslo sist veke. Då var det berre å ta med seg PC-en og ha kontor i bilen. Eg hadde eit møte på Geilo då eg lada bilen og eit møte på Gol medan eg åt. Så tok eg nokre telefonar medan eg køyrde. Det var pausar som eg måtte ha teke uansett. På måndag var det planleggingsdag, så då hadde eg heimekontor, fortel Olav Mikal.

Sjølv om fleksibiliteten er stor, har gjengen i H2 faste møtepunkt kvar veke. Alle må vera med. Det er viktig for å ha oversyn og for å passa på at alle har det bra.

Zoom Førre Neste

Breitt og variert

Det er mange føremoner med å jobba i ei bedrift på bygda. Arbeidsoppgåvene er varierte. H2 har store prosjekt som går over fleire år og mindre prosjekt som tek berre nokre timar.

– Eg skal hjelpa Lid Jarnindustri med ei vedmaskin. Det er kanskje ein ti timars jobb, og så har eg Langevåg som er eit toårsprosjekt. Eg får testa meg og brukt den faglege kompetansen eg har, samstundes som eg får innblikk i andre sine fagfelt. Her har eg andre yrkesgrupper som sit tett på meg og som eg kan læra av. Eg har ikkje opplevd å få nei når eg spør nokon. Sjølv om folk har det travelt, så seier dei ja, seier Olav Mikal.

Zoom Førre Neste

Fag og kos

Geoplan er ei av bedriftene som har kontor i Kassen, og H2 og Geoplan har god nytte av kvarandre. Sivilarkitekt og dagleg leiar i Geoplan, Solveig Valland seier samarbeidet vart etablert lenge før kontorfellesskapet i Kassen. H2 og Geoplan var samlokaliserte i eit anna lokale tidlegare. Nokre år etter at H2 hadde etablert seg i Kassen, flytta Geoplan AS etter.

– Me driv med kart, regulerer og teiknar bygg. Då er det av og til at me har bruk for hjelp, samarbeid og rådføring med H2. Andre gonger har H2 bruk for våre tenester, seier Solveig.

Geoplan AS har mellom anna teikna Solstrand, som er eit bustadprosjekt sentralt i Norheimsund, på oppdrag for H2.

– Så held me på å regulera nytt bustadfelt på Drage i Tørvikbygd. Det er eit av Fuglafjell sine prosjekt. Utan samarbeidet om nytt publikumsbygg på fartøyvernsenteret, på oppdrag for Hardanger og Voss museum, er vel dette dei to største prosjekta me samarbeider om no, fortel Solveig.

I tillegg til å ha fagleg utbyte av kvarandre, er dei på turar i lag.

– Det er eit koseleg fellesskap. Det er kjekt å eta lunsj saman. Før korona hadde me julebord, synfaringar og turar i lag. I tillegg til det å vera fleire som jobbar med dei same prosjekta, og å kunne gå over gangen for å rådføra seg fagleg, er det sosiale aspektet ein av hovudgrunnane til at me flytta opp i Kassen, seier Solveig.