Ein «Dag» i bassenget

Dag Instanes (30) er utan tvil ei energibombe. Spesielt godt likar han å ta energien ut i vatn. Med det som utgangspunkt, må ein kunna seia at han trefte «bull´s eye» då han fekk jobb som idrettspedagog i Hardangerbadet.

Dag er utdanna idrettspedagog frå høgskulen i Bø i Telemark. I Hardangerbadet hjelper han andre med å koma i betre form. Han legg til rette for riktig trening for dei som har skadar eller slit med motivasjon.

– Kvifor valde du å utdanna deg til idrettspedagog?

– Det var noko som fanga interessa mi då eg var i militæret, men eg har alltid vore interessert i helse.

Folkehelse engasjerer

På vidaregåande gjekk Dag på linja som den gongen heitte, helse og sosial, og etter kvart vart interessa for idrett vekt. Då han vart merksam på omgrepet frisklivssentral, som er ei førebyggjande helseteneste mange kommunar tilbyr, inspirerte det han til å ta ei idrettsfagleg utdanning.

– Folkehelse er eg er veldig engasjert i. Det er eit viktig arbeid, og er ei av dei store utfordringane våre. Det er veldig kjekt å vera med og forbetra andre sin livskvalitet. Det er eigentleg det som er den største motivasjonen min.

Dag vaks opp i Strandebarm og flytta frå bygda etter vidaregåande. Etter eit år på folkehøgskule i Trondheim avtente han militærtenesta i Ørland i Trøndelag. Sidan gjekk turen til høgskulen i Bø i Telemark, og no er han tilbake i Kvam.

– Det er fint og godt. Eg bur i Øystese, like ved rundkøyringa ved Børvenestunnelen. Eg går til jobb når det snør, og elles syklar eg, fortel Dag.

Han meiner det burde vore meir fokus på dei helsefremjande føremonene med å bruka andre framkomstmiddel enn bil.

I startgropa

Dag vart tilsett som idrettspedagog ved Hardangerbadet i desember 2020. I starten var det mykje jobb med å få ting i gang og å få på plass gode rutinar. Enno er ikkje alt på plass.

– Eitt år høyrest ut som lang tid, men når det skjer ting heile tida, kjennest det som kort tid. Me kjem framleis til å utvikla idrettspedagogstillinga. Det skal verta fleire tilbod og fleire aktivitetar som folk kan vera med på, seier Dag.

Han har jobba i badeanlegg tidlegare, både i Bø og i Strandebarm. Han har vore innom frisklivssentralar og attføringssenter der brennpunkt har vore rehabilitering og folkehelse.

– Det er kjekt å jobba i eit bad som eg kjenner godt, men også å få jobba med folkehelse, legg han til.

– Aquagym passar for alle

Dag er ekstra entusiastisk når han pratar om gruppetimane i Hardangerbadet. Energinivået er høgt både på bassengkanten og i vatnet. Dag er av den naturleg entusiastiske sorten, og han brenn for jobben. Han er full av lovord om gjengen som trufast stiller opp kvar onsdag og torsdag for å delta på aquagym.

– Det beste med jobben er definitivt gruppetimane. Noko av det eg synest er kjekkast, er å vera med folk, driva med fysisk aktivitet og halda folk i form. Det er kjekt å motivera og prøva å endra vanar og livsstil. Det vert eg motivert av, og det gjev meg energi. Og så er det jo veldig kjekt å jobba i eit bad.

I tillegg til å vera ei effektiv treningsform, er aquagym noko som passar for alle. Klokka 09.00 kvar onsdag morgon står Dag på bassengkanten og ropar kommandoar. «No skal me laga store bølgjer!» «Kom igjen!» «Ikkje gje deg no!» Han prøver å få deltakarane til å yta det beste dei kan.

– Aquagym passar for alle, for eldre, vaksne og yngre. Det passar for både dei som er i god form og dei som er i dårleg form, eller om du har ein skade. Aquagym er tungt om du gjev maks tempo heile tida, men dersom du for eksempel har ein skade i skuldra, så kan du variera motstanden i vatn. Det er ikkje slik at du alltid er nøydd til å løfta 50 kilo her. Her er det vatn du tek imot, og du kan sjølv velja kor hardt du pressar. Eg brukar røysta mi aktivt for å få alle til å ta ut det dei kan, men ikkje meir. Det er viktig. Me vil ikkje ha skadar, seier Dag.

Trening i vatn er skånsamt for ledd og musklar, og Dag meiner treningsforma er tenleg for alle.

– Trening i vatn gjev ingen støyt mot kroppen. Om du er ung og har mindre behov for skånsam trening, er det likevel avlastande, og gjev variasjon.

Treningsrettleiing og symjeteknikkar

Ein kan òg bestilla individuelle treningstimar hos Dag. Hardangerbadet har valt å kalla det treningsrettleiing, fordi det handlar mykje om rettleiing og tilrettelegging i tillegg til sjølve treninga.

I tillegg underviser Dag i ulike symjeteknikkar, som crawl og brystsymjing. Symjeteknikkursa er for dei som kan litt frå før og som ynskjer å gå frå å vera ein badar til ein symjar. Johan Larsen Aksnes er ein av dei som har teke kurs hos Dag.

– Eg kunne symja, men teknikken var heilt håplaus. Og eg kunne ikkje symja med hovudet under vatn, fortel Johan.

No sym han nesten dagleg i Hardangerbadet, og crawlteknikken er uklanderleg.

– Eg har jobba mykje med meg sjølv, seier han.

Dag er godt nøgd med framgangen til Johan og dei andre kursdeltakarane.

– Min favorittsymjeteknikk er nok crawl. Det var det eg lærte mest av på skulen i Bø då eg gjekk på idrettslinja der. Eg har trent ein del crawl, og det er ein teknikk eg kjenner meg veldig komfortabel med. Så kan eg jo alle dei andre teknikkane óg, men butterfly er kanskje det eg er svakast i, seier Dag.

Dag understrekar at det er viktig å vera i trygg i vatn om ein til dømes skulle hamna i ein situasjon der nokon dett på sjøen og treng hjelp. Han er kvalifisert livredningsinstruktør og har mellom anna hatt livredningskurs for elevar ved Kvam vidaregåande skule.

– Kva betyr Hardangerbadet for bygda, trur du?

– Hardangerbadet er viktig for bygda. Det trekkjer folk til bygda, men spelar òg ei rolle for folkehelse og symjeopplæring.