Amanda og Magnus stakk av med premie verd 30.000 kroner

Magnus Botnen og Amanda Gjerde har gjennomført full overhaling av barnerommet utan å gje lommeboka varige mein. Eit gåvekort på 30.000 kroner frå XL-BYGG Kvam sytte for det.

1. januar 2024 offentleggjorde XL-BYGG Kvam ein konkurranse i sosiale medium som fanga interessa til nær 70 kvemmingar. Konkurransen, «Ditt draumeprosjekt», lokka med varer og materialar til ein verdi av 30.000 kroner. For å delta, måtte du senda ei skriftleg skildring av oppussingsprosjektet ditt og grunngje kvifor du fortente å vinna.

Anne Sissel Froastad hos XL-BYGG Kvam hadde ansvar for konkurransen. Ho fortel at responsen var over all forventning.

– Korleis plukka de ut vinnaren?

– Alle deltakarane hadde flotte draumeprosjekt som dei beskreiv til oss. Grunnane til at nettopp Magnus og Amanda vann, er samansette. Kort oppsummert heiar XL-BYGG Kvam på all aktivitet i Kvam, og spesielt på unge vaksne som er i etableringsfasen og som ynskjer å busetja seg her. Magnus og Amanda er eit godt døme på det, og valet fall difor på dei denne gongen, fortel Anne Sissel.

Magnus og Amanda såg konkurransen på Facebook, og bestemte seg raskt for å delta.

– Kvifor ikkje? seier Magnus når me spør kvifor dei melde seg på.

Etter nøye vurdering av søknadene vart Magnus og Amanda kåra til vinnar 9. februar. Då starta prosjektet for alvor.

Par med planar

Magnus og Amanda har ingen planar om å flytta frå heimbygda. Det ber huset deira på Børvenes tydeleg preg av. Her vert det rydda og bygd både ute og inne. Sjølv om begge studerte utanbygds i nokre år, ynskte dei alltid å busetja seg i Kvam.

– Me har budd i Kvam heile vegen og vore det ein kanskje kan kalla pendlarstudentar, fortel Magnus.

Han er for tida lærar ved Strandebarm skule, og Amanda arbeider som vernepleiar i eit bufellesskap. Paret gjev med andre ord eit solid bidrag til arbeidskrafta i Kvam.

Då dei fekk vita at dei venta sitt fyrste barn, melde behovet for eit barnerom seg. Nyhendet om konkurransen til XL-BYGG kom difor som bestilt.

– Ja, det var midt i blinken, seier Magnus.

No er rommet ferdig, og veggene er måla i ein dus, rosa farge. Magnus stolar på jordmora sine kvalifiserte spådomar.

– Me satsar på at det er ei jente.

Og det kunne han med rette. Før denne artikkelen kom på trykk, vart vesle Sofia fødd.

Frå draum til røyndom

Zoom Førre Neste

– Me byrja rivinga nesten med ein gong, fortel Magnus.

Rommet var allereie planlagt i søknaden, så dei visste kva som skulle gjerast. Materialar måtte bestillast, og medan dei venta på levering, gjekk dei i gang med å riva.

– Det var mange hol i veggene, og det var mykje gamal isolasjon som måtte vekk, seier Magnus.

Klimaet i det opphavlege rommet var ikkje optimalt for ein nyfødd. Difor valde dei å fornya rommet frå inst til ytst, med ny isolasjon, nye vegger, golv, tak og vindauge.

– Det vart ei totalrenovering, seier Magnus.

Vona er å sleppa å gjera noko meir med rommet når resten av huset skal under hammaren. Til og med røyr til vassboren varme er lagde.

Bratt læringskurve

Det er ikkje berre utstyr og materialar som skal til for å byggja eit nytt rom. Også handverk krevst for å realisera draumen. Magnus og Amanda har gjort mesteparten av arbeidet sjølv. Men litt hjelp frå familie og vener må dei innrømma at dei har fått. Magnus har ikkje tal på kor mange timar med arbeid som er lagde ned.

– Men det er veldig kjekt å prøva seg på nye ting, seier han.

Anne Sissel frå XL-BYGG Kvam er imponert over innsatsen.

– Det er mykje godt arbeid her. Det er lærerikt å halda på, og det er viktig å tora å prøva, seier ho.

I framtida kan barnerommet verta eit kontor, men planløysinga vert som ho er.

– Me treng ikkje flytta på noko, seier Amanda.

Ein suksess for begge partar

Konkurransen har vore ein suksess, både for vinnarane og for bedrifta, og Anne Sissel reknar med at XL-BYGG Kvam kjem til å arrangera fleire slike konkurranser.

– Det var god respons, og me trur endå fleire vil delta når dei ser resultatet, seier ho.

For Magnus og Amanda har det vore ei positiv oppleving. Dei har handla mykje hos XL-BYGG Kvam før og kjenner difor både vareutvalet og dei tilsette godt.

Sjansen for å vinna ein slik konkurranse er kanskje større på ein liten plass?

– Ja, det bur jo ikkje så mange i Kvam. Så det er ei god moglegheit, seier Magnus.

Framtidsvoner

Oppussingsreisa stoppar ikkje her. Paret har fleire prosjekt på gang. Huset frå 60-talet kjøpte dei i desember 2021, og sidan har dei vølt og flikka på eigedomen. Erfaringa dei har fått, gjev inspirasjon til å halda fram, og dei er etter kvart vorte kløpparar til å snikra og måla.

I Sjusetevegen har XL-BYGG Kvam varelager, butikk og eit utstillingslokale på 200 kvadratmeter. Her kan ein henta inspirasjon til små og store husprosjekt. For Magnus og Amanda har det vore til god hjelp.

Dei takkar XL-BYGG Kvam for moglegheita dei fekk gjennom «Ditt draumeprosjekt».