Kven dreg det lengste strået?

Som trufast lesar av Hordaland Folkeblad opplever eg at det no har hopa seg opp mykje rart om «skular i Kvam herad». Det nye er at ungane i Tørvikbygd må finna ut kva veg dei skal velja til og frå skulegang, enten utover eller innover. Kanskje like godt at fjorden ikkje lenger er ferdselsåra, berre eit stengsel ved kryssing. Vel dei utover, vil det i mange år engasjera foreldre og andre i kampen for å runda litt av dei stadig nymåla fjellnobbene som opplevast å gjera vegen smalare og smalare dess lenger ut i heradet du kjem. Kortare strå enn det dei finn langs vegen, som knapt kan nemnast som ein veg, finn ein ikkje andre stadar i heradet.

Som tidlegare elev ved «Yrkesskulen» i Steinsdalen var det ein god skule for meg, ikkje på grunn av gardinene i klasserommet som dempa litt på regnvatnet som kom i god fart frå sørvest og medførte at halve pulten var dass våt og andre halvdelen, der gardinene stoppa regnet, var så nokolunde brukande. Det var mangel på tilrettelagd busstransport til og frå skulen for oss som hadde reiseveg, så løysinga vart moped handla hjå «Soldalen» og frysa fingrane av seg vinterdagane. Det var plassen og gode, dyktige, engasjerte og ikkje minst motiverande lærarar som fekk meg til å både yta og ta gode val vidare i det vaksne liv. At skulen no flyttast ned til sentrale strok, er no berre trist. Det er eit tarveleg strå dei får med seg, sjølv om det er frå Steinsdalen.

Gymnaset i Øystese blir flytta til den nye vidaregåande skulen som ligg så sentralt til, at heile tomta og kanskje litt til er utnytta til, ja, skulebygget. Frisk luft får elevane til og frå butikk som kan by på både søt og sunn nistemat. Skal berre passa på at elevane får med seg eit halvlangt eller halvkort strå før dei fer gjennom tunellen.

Er Øystese skule eller FAU ved skulen sine argument for at barneskulen må for all del ikkje bli verande på Rossvoll, vel gjennomtenkte?

«Dei mjuke trafikantane passar dårleg saman med skulebussar og auka personbiltrafikk», skriv FAU. No beveger eg meg ut på tynn is, men er det så mange elevar på Øystese skule som fraktast til og frå skulen i store bussar, for dagens skulebussar til og frå gymnaset bør ikkje få mange dagar på seg for å finna ut av at dei slett ikkje treng kjøra oppom Rossvoll på si ferd til og frå den nye vidaregåande skulen. Kan det hende at personbiltrafikken som elevar på avgangstrinnet på gymnaset utgjer, no hamnar i eit kappløp mellom alt på fire hjul om parkeringsplassar som ikkje finst ved den vel planlagde stad for vidaregåande skulen.

«For langt til område ved ungdomsskulen», når uteområde skal brukast. Garantert spreke ungar blir det, for litt slit i motebakke tar ingen skade av, og ungar likar å tøye grenser.

Det med «fortener ein ny skule her» … ta heller med eit langt strå på vegen opp til Rossvoll og gjerne erfara plasseringa.

Ungane som har fått nok av stengsel og gjerde ved sin skule, så om stengsla og gjerda er godkjende eller ei, har høyrt rykte om at på skulen på Rossvoll har ungane ansvar for å hegna om den siste hesten på Rossvoll. Tenk, gå på ein skule utan stengsel og gjerde, «me tar øvste-vegen til Rossvoll, tar med til hesten dei lengste stråa som veks så frodig ved den gamle bosstippen i Ståene.»