Børve sette konkurrentane på plass

Hanna Børve braut barrierar då ho fredag vann eit renn i noregscupen i skiskyting for seniorar for fyrste gong.

Ho skaut 20 treff for aller fyrste gong, samstundes som ho altså gjekk til topps i sitt fyrste store seniorrenn.

– Eg er utruleg glad. Det verkar også som om andre er det. Eg har fått utruleg mange gratulasjonar etter at eg kryssa målstreken. Det er hyggjeleg at så mange fylgjer med, både heime i Øystese, i skiskyttarmiljøet og elles. Eg har hatt mine utfordringar det siste halvtanna året. Det gjer det ekstra godt å vinna dette rennet, seier Børve etter at ho har sett alle konkurrentane på plass i noregscupen på Østre Toten.

Det skjedde ikkje utan dramatikk. Det var nemleg fleire som tok opp jakta på det lokale stortalentet etter at ho hadde levert den 4. feilfrie serien på standplass. Frida Dokken Tormodsgard var ei av dei som gjorde eit tappert forsøk på å henta inn Børve, som var fast bestemt på å ikkje gje seg utan kamp. Det same gjorde utøvaren frå Kvam Langrenn- og Skiskyttarklubb, som heldt unna for både Dokken og dei andre.

Sigersmarginen var 4 sekund, og det var 7 sekund ned til Synne Owren frå Vingrom, som sikra seg 3.-plassen.

Ville ha sigeren

– Kva tankar gjekk gjennom hovudet ditt før fjerde og siste skyting?

– Eg prøvde å tenkje på arbeidsoppgåvene og det eg hadde lukkast med på dei tre første skytingane. Det er lett å mista fokus på siste skyting når utgangspunktet er bra og mykje står på spel. Difor er eg veldig nøgd med at eg heldt hovudet klart og fekk ned alle blinkane. Det var fyrste gong eg hadde fire feilfrie skytingar i ein fellesstart, seier Børve.

Ho vart juniornoregsmeister og oppnådde mange gode resultat i dei åra ho konkurrerte i juniorklassen.

Starten på seniorkarrieren har vore meir utfordrande. Fyrst og fremst fordi ho har slite med ein rygg som har krangla, og det har teke tid å få orden på han. I tillegg vart ho råka av koronaviruset, noko som øydela ein god del på seinhausten i 2023 og inn i 2024.

På grunn av ryggplagene fekk ikkje Hanna den kontinuiteten i treningsarbeidet som nesten er ein føresetnad for å prestera på dette nivået. Både treninga og prestasjonane vart hemma av at det var mykje av og på førre vinter. Det var likevel aldri aktuelt å gje opp.

Fast bestemt på å halda fram

– Eg vurderte eigentleg aldri å gje meg. Til det er eg for glad i skiskytinga. Det var ho som førte meg til Lillehammer då eg var ferdig med tre år på Noregs Toppidrettsgymnas på Geilo. Eg har ikkje angra på valet, ettersom eg har funne meg godt til rette i OL-byen. Eg er ein del av eit kjempebra team, og eg er veldig nøgd med oppfølginga eg får i Team Havland. Der er det ei bra jente- og gutegruppe.

– Kor viktig er det å få ein slik siger som du fekk på Gjøvik?

– Det er utruleg kjekt å få betalt for den treningsjobben som er lagd ned. Det har, som sagt, vore nokre tunge stunder etter at eg tok steget opp i seniorklassen. I dag er dei gløymde, seier Børve, som kjempa hardt då utfordrarane tok opp jakta på henne.

Kvemmingen fylgde sigeren opp med å verta nummer 3 i noregscupsprinten laurdag, 19,3 sekund bak Dokken.

Malin Auganæs Bergtun frå Kvam vart nummer 12 i fellesstarten fredag og nummer 7 i sprinten laurdag. Ho representerer både Kvam Langrenn- og Skiskyttarklubb og Team Midt-Norge.