Kritiske til krav om notat
Om ein elev vert send på gangen, må skulen laga eit skriftleg notat som eleven og foreldra kan klaga på.
Det same gjeld til dømes om ein lærar har ein samtale med ein elev som ein reaksjon på brot på skulereglar.
Kravet om eit skriftleg notat går fram av paragraf 11 i framlegget til forskrift om skulereglar i Ullensvang, som utval for kultur og levekår drøfta 21. januar.
Artikkelen held fram under annonsen.
Må skriva om alt
I framlegget vert det slege fast at om «ein av reaksjonane vert sett i verk mot ein elev, må skulen dokumentera dette med eit skriftleg notat. Notatet skal kunna klagast på og må såleis ha opplysningar om korleis ein kan klaga.»
Reaksjonar elevane kan få
A. samtale mellom kontaktlærar/faglærar og elev
B. merknad – gjeld berre ungdomstrinn
C. kontakt med føresette
D. skriftleg melding til føresette
E. pålegg om oppgåver for å retta opp skade ein har påført skulen sin eigedom eller eigedelar (til dømes rydda søppel, vaska golv, fjerna tagging og liknande)
F. nærvær på skulen før eller etter skuletid i samband med samtalar eller for å utføra pålagde oppgåver
G. lærar kan visa bort ein elev frå eiga undervisning i ei økt (opplæringslova §13-1)
H. leggja beslag på farlege gjenstandar som kan nyttast til å utøva skade på andre
Framlegget fekk lærarane ved Jondal skule til å reagera i høyringa. Dei meiner det er uklart i kva tilfelle det skal lagast notat.
– Me tolkar formuleringa i forskrifta som at det skal skrivast eit utfyllande notat kring alle brot på reglane, også til dømes gløyming av utstyr eller lekser. Dette vil medføra mykje ekstraarbeid for lærarane, og me ser at dette ikkje kan gjennomførast i praksis, skriv arbeidsplasstillitsvald Anna Baggegard i Utdanningsforbundet på vegner av klubben.
Lærarane meiner at det bør presiserast at kravet om skriftleg notat berre gjeld i samband med alvorlege regelbrot som uansett krev enkeltvedtak etter forskrifta. Denne tolkinga legg rektor Sara Marie Røstbø til grunn, heiter det i innspelet.
Ein glipp
Innspelet er ikkje kommentert i sakspapira, og punktet er heller ikkje endra i framlegget.
HF har spurt administrasjonen i kva tilfelle det er tanken å krevja skriftlege notat. Skulefagleg rådgjevar Marit Langås vedgår at det ikkje kjem tydeleg nok fram i framlegget til forskrift kva reaksjonar det gjeld. I det gamle ordensreglementet vart det spesifisert at kravet gjeld i saker etter paragraf 12 i opplæringslova, men denne presiseringa kom ikkje med i det ny framlegget til forskrift.
Dette vil administrasjonen opplysa kommunestyret om før saka vert avgjord 5. februar, skriv Langås til HF. Ho opplyser at det er ein glipp at ikkje innspelet frå Jondal skule er vurdert i sakspapira.
