Interpellasjon til Kvam heradsstyre 7. februar 2025
Håvard Gjerde, Raudt Kvam
Til ordførar Torgeir Næss
Artikkelen held fram under annonsen.
Tilknytinga til ACER og EU sine tidlegare energimarknadspakker har ført til straumpriskrise. Dette vart i si tid kalla «uproblematisk», og kritikarane vart kalla konspirasjonsteoretikarar. Ynsket om å innføre nye sokalla «uproblematiske» kraftmarknadsdirektiv frå EU har nå ført til regjeringskrise.
Den største og viktigaste industriarbeidsplassen i Kvam er tufta på rein, billig og kortreist kraft. Denne arbeidsplassen står i fare når det største konkurransefortrinnet meir og meir vert underlagt den dysfunksjonelle europeiske kraftmarknaden. Derfor må Kvam herad ta tydeleg stilling i den store politiske kampen som nå står om råderetten over kraftressursane våre.
Administrerande direktør i Kvam Kraftverk har tatt stilling i kraftpolitikken. I artikkelen «Vindkraft er nødvendig for det grøne skiftet» kjem det fram analysar og konklusjonar som passar godt med EU sin kraftmarknadspolitikk, men som passar dårleg med omsynet til naturmangfald og norske kraftinteresser.
Innbyggjarane våre fortener å vite kva politikarane Kvam herad meiner om kraftpolitikk og vindmølleutbygging. Det er kanskje ikkje det same som direktøren i Kvam Kraftverk.
Spørsmål til ordføraren:
1. Stiller ordføraren seg bak den verkelegheitsforståinga og dei konklusjonane som kjem fram i artikkelen «Vindkraft er nødvendig for det grøne skiftet», signert av direktøren for Kvam Kraftverk?
2. Kvam Kraftverk er eigt av heradet og heradsstyret er generalforsamling. Ser ordføraren problematiske sider ved at direktøren for Kvam Kraftverk tar offentleg stilling til svært omstridde politiske spørsmål utan å ha rådført seg med eigaren?
4. Korleis meiner ordføraren at kraft- og industrikommunen Kvam bør stille seg til ytterlegare norsk tilpassing til EU sin indre energimarknad og EU sin 4. energimarknadspakke?
Artikkelen held fram under annonsen.
Forslag til vedtak:
1. Kvam heradsstyre ber regjeringa og Stortinget seie nei til EU sin 4. energimarknadspakke og ytterlegare norsk tilpassing til EU sin indre energimarknad.
2. Kvam heradsstyre ber regjeringa og Stortinget utvikle ein nasjonal kraftpolitikk som både varetar naturen og interessene til innbyggjarar og næringsliv. Dette skjer ikkje gjennom ytterlegare tilpassing til EU sin dysfunksjonelle kraftmarknad, men gjennom rimelege og føreseielege kraftprisar i Noreg, og streng regulering av krafteksporten.
3. Kvam herad ber regjeringa og Stortinget trappe opp støttetiltak til energieffektivisering i bustader, offentlege bygg og industri, og større satsing på fjernvarmeanlegg. Noreg treng ikkje å vedta nye EU-direktiv for å kunne gjennomføre slike tiltak i Noreg.
4. Så lenge Noreg har kraftoverskot nok til fri etablering av kraftkrevjande datasenter og fåfengde tiltak som elektrifisering av sokkelen, ser Kvam herad ikkje noko behov for rask utbygging av vindkraft på land. Me treng heller ikkje EU-direktiv som skal få slik utbygging på hurtigspor.
