Kunnskapsministeren ber skulane stramme inn på mobilbruk

Kunnskapsminister Kari Nessa Nordtun (Ap) meiner også vidaregåande skular bør stramme inn på mobilbruk, skriv Klassekampen.

I fjor vår vart det innført ei tilråding om mobilforbod i norske grunnskular. For elevar på vidaregåande skule gjeld forbodet i timane, men ikkje friminutta.

Onsdag vart det kjent at éin av ti elevar på vidaregåande skule har vore borte frå skulen etter å ha opplevd noko vanskeleg i sosiale medium. Og fråværet aukar, skriv Klassekampen.

Kunnskapsministeren meiner mobilen verken skal vere i lommene eller sekken til elevane og tilrår at skulane skaffar seg mobilhotell.

– Viss ein opplever dette som eit problem lokalt, bør ein stramme inn også på kvar enkelt vidaregåande skule, seier Nordtun.

På vidaregåande hadde kvar sjette elev meir enn 50 timar fråvær, ifølgje tal frå Utdanningsdirektoratet publisert i haust. Det er ei dobling frå før pandemien.

(©NPK)