No kan buss- og togbillettar frå heile landet bli kjøpt i éin app
Etter å ha jobba lenge med å samle billettar for all offentleg kollektivtransport i éin app, er målet om å dekkje alle fylke nådd for appen Entur.
Frå og med 18. november kan reisande kjøpe alle enkeltbillettar i appen, i tillegg til periodebillettar for fleire område.
Togbillettar til reiser med Vy, SJ og Go-Ahead er også tilgjengelege i appen.
Artikkelen held fram under annonsen.
Administrerande direktør Christel Borge i Entur seier at ho er svært fornøgd, men at ho ønskjer fleire kommersielle buss-selskap om bord.
– Vi har allereie avtale med Flybussen, slik at det er mogleg å kjøpe billettar til fem av rutene deira i Entur-appen. Desse rutene er i Oslo-området. Vi håpar å få på plass fleire avtaler.
Appen er spesielt praktisk for dei som reiser til stader der dei ikkje ferdast dagleg – sidan han gjer at ein slepp å laste ned ein app per buss-selskap.
I tillegg til å utvikle og drifte appen arbeider Entur også med å utvikle og drifte ein nasjonal digital infrastruktur for reiseplanlegging og billettkjøp. Det betyr meir for pengane for dei reisande gjennom fellesløysingane og samarbeid i sektoren.
(©NPK)
