Uvêret Jakob på veg – raudt farevarsel for regn i store delar av Vestland

Farevarselet for nedbør på Vestlandet er oppjustert til raudt nivå som følgje av uvêret Jakob. Det er meldt opp mot 180 mm nedbør på eitt døgn.

Farevarselet gjeld for midtre og indre strøk av Vestlandet.

– Torsdag er det venta ekstremt mykje regn, lokalt 120–180 mm på 24 timar. Natt til fredag vil nedbøren gå over til byer og minke, først i nord, skriv Meteorologisk institutt.

Den ekstreme nedbørsmengda vil medføre fare for overvatn i tettbygde område, straumbrot og vanskelege køyreforhold. Det er stor fare for stengde vegar og overvatn ved bekke- og elveløp.

– Ein del stader vil mellombels kunne miste vegsambandet, gjerne fleire dagar, opplyser Varsom.no.

Tilrådinga frå varslingstenesta er å følgje instruksjonar frå lokale styresmakter og råd frå beredskapsstyresmakter. Det blir også tilrådd til å gjere heimen klar for eit potensielt lengre straumbrot, og å vurdere nøye om reising faktisk er nødvendig.