Dette betyr statsbudsjettet for lommeboka

Det blir lågare inntektsskatt for alle som tener under éin million kroner, kutt i avgiftene til vatn og avløp, og lågare avgift på flyreiser innanfor Europa.

I det ferske forslaget til statsbudsjett for 2025, gjer regjeringa fleire grep som kan få direkte innverknad på lommeboka til folk flest.

Prisveksten neste år blir berekna til 3 prosent.

For folk som tener mindre enn 1 million kroner i året, vil regjeringa kutte skattane med nokre hundrelappar. Dei som tener meir, vil få meir i inntektsskatt.

Bensinavgiftene i sum aukar med 7 øre neste år. Dette er likevel ein auke på 0,95 prosent, som altså er lågare enn prisveksten. Det betyr at bensinavgiftene relativt sett blir lågare neste år.

Parallelt kuttar regjeringa i ei anna avgift for bileigarar, nemleg avgifta på trafikkforsikring for personbilar og varebilar. Den går ned med 1,22 kroner i døgnet, noko som betyr eit avgiftskutt på 445 kroner i løpet av året.

Billigare flyreiser

Flypassasjeravgifta blir kutta neste år, noko som vil bety billigare flyreiser. Flypassasjeravgifta er todelt, og det er den såkalla «låge satsen» som blir foreslått redusert i forslaget til statsbudsjettet for neste år.

Den låge satsen gjeld på alle reiser til stader i Noreg eller Europa, og er i dag på 85 kroner per passasjer. Neste år foreslår regjeringa å setje henne ned til 60 kroner.

Fleire andre avgifter ligg an til å auke i tråd med prisveksten på 3 prosent. Det gjeld mellom anna avgiftene på alkohol, tobakk og sukker.

Frikortgrensa blir auka

Eit anna grep vil påverke vass- og avløpsgebyra.

Mange kommunar har varsla at desse vil auke neste år, men for å lette på dette blir meirverdiavgifta kutta på vatn og avløp frå 25 til 15 prosent neste år. Dette vart kjent i forkant, gjennom ein budsjettlekkasje i VG.

Neste år vil regjeringa også bruke 515 millionar kroner på å justere opp frikortgrensa frå 70.000 til 100.000 kroner. Det betyr at ein kan tene inntil 100.000 kroner utan å betale skatt.

Pendlarfrådraget blir auka

Her er nokre andre grep som påverke lommeboka:

* Straumstøtta for hushald blir også neste år vidareført. Det varsla finansministeren i Stortinget allereie i mars. Regjeringa har også varsla at fastprisavtalane på straum for næringslivet blir vidareførte.

* Butikktilsette skal få handle meir frå eigen arbeidsstad utan å måtte skatte for det. Ifølgje finansministeren foreslår regjeringa å auke grensa for personalrabattar – frå dagens 8000 kroner til 10.000 kroner i 2025, ifølgje FriFagbevegelse.

* Maksimalt frådrag for fagforeiningskontingenten i 2025 vil vere 8250 kroner – ein auke på 250 kroner frå 2024, ifølgje FriFagbevegelse

* Pendlarfrådraget blir auka, botnfrådraget går opp med 300 kroner til 15.250 kroner. Øvre grense blir auka frå 97.000 til 100.880 kroner, og kilometersatsen blir auka frå 1,76 kroner til 1,83 kroner.

* Regjeringa har også varsla at innbyggjarane i dei 212 minst sentrale kommunane i landet vil få sletta studielånet sitt med 25.000 kroner i året frå januar 2026. I Finnmark og Nord-Troms, som allereie har ei slik ordning på plass, blir satsen for sletting av gjeld dobla frå 30.000 kroner til 60.000 kroner i året. Til saman vil dette koste om lag 1,3 milliardar kroner.

(©NPK)