– Brann i køyretøy
Eit køyretøy i Tørvikbygd i Kvam tok fyr laurdag føremiddag.
Det melde Vest politidistrikt på X laurdag klokka 10.50. Nokre minutt seinare kom meldinga om om at brannvesenet var på plass og i gang med sløkking.
Det vart ikkje meldt om skadde eller sakna, og heller ikkje om spreiingsfare, ifylgje politiet.
Artikkelen held fram under annonsen.
Ifylgje Vegtrafikksentralen vest vart fylkesveg 49 sperra om lag éin kilometer frå Tørvikbygd mot Norheimsund på grunn av hendinga. Om lag klokka 12.15 var vegen open att.
Ifylgje Bergens Tidende var det to personar i bilen. Dei kom seg ut.
– Me hadde dei på video mens dei prøvde å sløkkja, og bad dei trekkja seg vekk då det vart mykje eld og røyk. Dei gjorde ein god jobb, seier vaktkommandør Jostein Steinsland-Hauge ved 110-sentralen til Bergens Tidende.
Klokka 12.30 melde Vest politidistrikt at politiet og brannvesenet var ferdige på staden. Sak vert oppretta, og bilbergar vart bestilt.
