Hjartesoner skal gi tryggare skuleveg
Ein trygg skuleveg er kommunen og skulen sitt ansvar, meiner Trygg Trafikk.
– Ein trygg skuleveg er eit samarbeidsprosjekt mellom dei som køyrer, dei som syklar og dei som går. Men det er også eit samarbeid mellom foreldre, skule og kommune, seier opplæringssjef Lena Westrum i Trygg Trafikk, i ei pressemelding.
Organisasjonen har i fleire år oppfordra foreldre til å engasjere seg meir i skulevegen til barna, men no ønskjer dei å få fleire skular og kommunar på banen. Hjartesoner kring skulen er tiltaket som blir trekt fram.
Artikkelen held fram under annonsen.
Ifølgje Westrum bidreg ein hjartesone til mindre foreldrekøyring og til å skape tryggare skulevegar. Dette inneber ein trafikksikker sone kring skulen med lite biltrafikk og droppsoner for levering og henting.
Hjartesoner kan òg vere tiltak som trafikkvakter, betre sykkelparkering, følgjegrupper, opplæring på skulen og gå-til-skulen-aksjonar.
I dag er det over 350 hjartesoneskular i Noreg.
(©NPK)
