Enkle grep kan gjere fjellturen tryggare

Dei aller fleste har hatt godt fjellvett i sommar, men det har ikkje vore problemfritt. – Vi ber alle om å velje tur etter evne og hugse på at vêret kan skifte brått, seier hjelpekorpsleiar i Røde Kors.

– Vi ligg på om lag 1700 redningsaksjonar i året, seier Jarle Bjørge Øverland, leiaren i Landsråd Hjelpekorps i Røde Kors, til Nynorsk pressekontor.

Tala for denne sommaren blir ikkje klare før seinare i år, men Øverland trur talet på redningsaksjonar dei har vore med på vil liggje ganske likt som tidlegare år.

– Det er som regel litt fleire aksjonar på sommaren når fleire er ute, og vi rykker i gjennomsnitt ut på om lag fem aksjonar om dagen i denne perioden, stadfestar Øverland.

Han fortel at dei vanlegaste redningsaksjonane Hjelpekorpset bidreg på er enten til folk som har skadd seg på tur, eller leiteaksjonar der nokon har gått seg bort.

Rekordsommar

Stadig fleire vel å bruke sommarferien i fjella og naturen, ifølgje Den Norske Turistforening (DNT).

– Tendensen er at vi ligg føre fjoråret på dei fleste område, og dei betente hyttene våre melder om glade turfolk og mykje besøk, seier generalsekretæren i DNT, Dag Terje Klarp Solvang, i ei pressemelding.

Han viser til at oppdaterte medlemstal per 1. august ligg på 318.589, ein auke frå fjoråret der talet låg på 313.353 på same tid.

– At DNT blir større er ikkje nødvendigvis viktig i seg sjølv, men at fleire kjem seg ut i naturen er fantastisk, seier Solvang.

Fleire oppdrag i bratt terreng

Årsrapporten til Hovudredningssentralen (HRS) viser at talet på redningsoppdrag har auka dei siste åra.

Førebels har redningsleiarane i år hatt færre oppdrag enn i same tidsrom i fjor, seier operativ inspektør Andreas Næsheim til Bergens Tidende (BT).

Mykje av grunnen er færre skogbrannar, samstundes har oppdrag i bratt fjellterreng har auka.

Til BT seier Thomas Horgen, leiaren i Norske alpine redningsgrupper (NARG) at han trur mange overvurderer evnene sine.

Jarle Bjørge Øverland frå Hjelpekorpset trur òg at dette kan skuldast at fleire ønskjer å teste dei vanskelegare rutene, men også at sommaren har vore prega av svært skiftande vêr.

I dei mest brukte turområda har det vore relativt lite behov for ekstra innsats, mellom anna på Trolltunga der førebyggjande arbeid dei siste åra har gitt resultat. I Jotunheimen har det vore stor aktivitet, spesielt i områda kring Galdhøpiggen og Besseggen. Oppland Hjelpekorps melder at sjølv om fleire søker hjelp, har det berre vore eit par mindre hendingar i høgare fjellområde i sommar dei har vore med på.

Det gode sommarvêret i nord har heller ikkje ført til noko særleg auke i oppdrag frå Røde Kors. Frå 1. mai til 1. august var det registrert 55 aksjonar i Nordland, på linje med dei siste åra.

– Vi har hatt mykje aktivitet og assistanseoppdrag, men færre redningsaksjonar, seier Arne-Andre Karlsen, distriktsrådsleiar i Røde Kors.

Fjellvettreglane gjeld framleis

Øverland poengterer at det er fleire enkle grep ein kan ta for å redusere faren for ulukker når ein sjølv legg ut på tur.

– Ei klar oppfordring er å følgje fjellvettreglane og planleggje turen sin deretter, seier han.

Dette inneber også å vere medviten på kva ein pakkar med seg.

– Ta gjerne med litt ekstra klede, mat og drikke, i tillegg til ein powerbank. Ein halvliter vatn kan fort bli lite om det skjer noko. Dessutan er det lurt å ta med seg litt førstehjelpsutstyr.

Klassikarane kart og kompass er også klassikarar av ein grunn. Då er ein betre førebudd om telefonen skulle gå tom for straum eller ikkje ha dekning.

Om uhellet først er ute og du treng hjelp, fortel Øverland at det er viktig å melde frå så fort som mogleg. Vidare er det viktig å søke ly og behandle eventuelle skadar med det ein har tilgjengeleg.

Noko av det viktigaste er likevel å smørje seg med tolmod og halde seg i ro.

– Har du brukt tre timar på turen din, må du rekne med at vi brukar minst like lang tid, om ikkje meir, til å kome oss fram. Viss ein flyttar på seg, så kan det bli vanskelegare for oss å finne deg, forklarar Øverland.

(©NPK)