Miljødirektoratet ber om laksehjelp frå folket

Fisken møter på ei rekke hindringar på veg oppover norske vassdrag. Miljødirektoratet håpar folk vil vere med å gjere vegen til gyteplassane enklare.

– Hindringane er så mange at det er krevjande for styresmaktene åleine å gjere jobben raskt nok, seier prosjektleiar Jo Halvard Halleraker i Miljødirektoratet i ei pressemelding.

Han ber folk ta bilete av hindringar fisk møter i innsjøar og elvar.

Den mest utbreidde hindringa for fisken er ifølgje Miljødirektoratet kulvertar med form som tunnelrøyr. Direktoratet antek at rundt 20.000 av desse er vesentlege hinder for både sjøaure, laks og ål.

– Før var det ikkje like stor kunnskap og merksemd om at det å leie elvar og bekker gjennom kulvertrøyr under vegar kunne hindre vandringa til fisken. Difor er det bygd mange hindringar rundt i heile landet, som vi ønskjer å få ein meir detaljert oversikt over, fortel Halleraker.

Han håpar at folk som ser hindringar for fisken vil laste ned appen Amber, der ein kan ta bilete av hindringa og leggje inn ei beskriving.

– Vi vil at folk som er på bilferie, fjelltur eller annan tur tek bilete og noterer litt når dei ser større røyr under vegar som dei tenkjer kan vere vanskeleg for fisken å passere, seier Halleraker.

(©NPK)