Jon Fosse er tildelt storkors av St. Olavs orden
Nobelprisvinnar Jon Fosse er forfremja til storkors av St. Olavs orden for forfattarskapen sin. – Eg verdset denne tildelinga svært mykje.
– Virket ditt for litteraturen og det nynorske språket er i ein eigen klasse, sa kansellisjef Mette Tverli på vegner av Slottet under utdelinga.
Torsdag 20. juni vart Fosse tildelt storkors av St. Olavs orden for eit framifrå forfattarskap. Dekorasjonen vart overrekt i lokala til Det Norske Samlaget, Fosse sitt mangårige forlag, i Oslo.
Artikkelen held fram under annonsen.
– Reisa di frå skremt skulegut til nobelprisvinnande forfattar er ei inspirerande forteljing om å finne sitt eige språk, og dele det med verda, stadfesta Tverli.
Fosse tok audmjukt i mot den ærefulle heidersutmerkinga. Han kommenterte spøkefullt at han heldigvis ikkje er sånn laga at han lèt suksessen gå inn på seg, men at han likevel er takksam for tildelinga.
– Det skal noko til å bere alt saman, la han til.
St. Olavs orden blir delt ut som «påskjønning for utmerka forteneste for Noreg og menneska». Storkors er høgaste grad i ordenen.
Berre to forfattarar har fått storkorset tidlegare. Henrik Ibsen tok imot storkorset i 1893, og Sigrid Undset i 1947.
(©NPK)
