Dramatisk brann i Kvam

Eit bustadhus i Norheimsund stod i brann torsdag ettermiddag.

Naudetatane rykte ut til staden etter at meldinga kom klokka 13.01. Ein mann og ei kvinne skal ha vore i huset. Begge er ute av bustaden, opplyste politiet, som rykte væpna ut til oppdraget.

Årsaka til væpninga er at det skal ha vore ei valdshending på staden før brannen, opplyser Vest politidistrikt på X.

110-sentralen opplyser at bustaden ikkje kan reddast. Brannen skal ha spreidd seg til alle rom. Mannskap jobbar med ettersløkking, opplyser HF sin journalist på staden litt før klokka 15. Det er eit stort hol i taket, og det vert sprøytt vatn frå alle kantar. Det er mykje røyk og ein del skodelystne i området, fortel han.

Ei kvinne vart send med luftambulanse til Haukeland Universitetssjukehus, og ein mann vart frakta til legevakta i sjukebil etter brannen.

Skadeomfanget til kvinna er ukjent. Mannen er lettare skadd. Han vert avhøyrd av politiet, opplyste operasjonsleiar Steinar Hausvik i Vest politidistrikt klokka 14.45.