Yr.no utvidar – no får du vêrvarselet tre veker fram i tid

Med Yrs nye 21-dagersvarsel kan du no få vêrvarselet for tre veker fram i tid. Varselet viser mellom anna temperaturutvikling og sjanse for nedbør dag for dag.

– Med 21-dagersvarselet utvidar vi tilbodet på ein god og nyttig måte, seier varslingsdirektør Bjørn Fjukstad ved Meteorologisk institutt i ei pressemelding.

Det nye 21-dagersvarselet er opphavleg basert på tre ulike vêrvarslingsmodellar, som alle oppdaterer seg med ulikt tidsintervall og har ei ulik geografisk oppløysing.

Yr har jobba tett med eit panel beståande av mellom anna bønder, folk frå havnæring og forsikringsbransjen. I tillegg har dei henta inn tilbakemeldingar frå brukarar som har testa ut ein beta-versjon av varselet som har lege ute sidan før førre sommar.

– Med bakgrunn i desse datane vart det gjort nokre endringar og justeringar i varselet, både datagrunnlaget og i konsept og design, før det no er lansert, seier produktutviklingssjef og leier Ingrid Støver Jensen for Yr i NRK.

Meteorologisk institutt seier at det kan bli gjort justeringar sjølv etter lansering. Dei gjer brukarar merksam på at det ligg ei lenke nedst på varselsida der brukarar kan sende inn tilbakemeldingar om det nye produktet.

På starten av 1970-talet lanserte Meteorologisk institutt 5-dagersvarselet, før det kjende 10-dagersvarselet kom på slutten av 90-talet.

(©NPK)