Opnar skulane att

Kriseleiinga i Kvam herad har bestemt seg for å opna skulane att tysdag.

Det kjem fram i eit presseskriv frå heradet måndag ettermiddag. Også oppmodinga om heimekontor og om at dei som kan det, held borna heime frå barnehage, fell vekk tysdag.

Mannskap jobbar framleis med å sørgja for at bekkar, kummar og elvar tek unna vatn. Elles vert det strødd så godt ein klarar med dei ressursane som er tilgjengelege, skriv heradet.

Det vil framleis vera farevarsel for skred tysdag, men farenivået er lågare enn i dag. Snøskredvarselet går frå raudt til oransje, og vil helst gjelda for fjellområda, skriv kommunen. Varsel for sørpeskred vil framleis vera på gult nivå fram til klokka 12 tysdag.

Trass avtakande fare oppmodar heradet om å ta omsyn til mykje nedbør, isete vegar, kjøving og skred.