Skulane vert stengde i Kvam måndag

Risikoen for glatte vegar ligg til grunn for avgjerda.

Den kommunale kriseleiinga vedtok sundag å stengja skulane måndag 22. januar. Årsaka er at vêromslaget kan gjera det vanskeleg å ferdast på vegane. Målet med stenginga er å redusera risikoen for ulukker og vareta tryggleiken til skuleborna, ifylgje Kvam herad.

Skulane vert likevel opne for elevar i 1.–4. klasse med føresette i samfunnskritiske funksjonar, og for elevar med særskilde behov. Heradet har bede om melding før klokka 18.30 om born som skal på skulen.

Barnehagane vil vera opne, men Kvam herad oppmodar flest mogeleg om å halda borna heime måndag. Foreldre må melda frå innan sundag klokka 18.30.

Også kulturskulen har avlyst undervisinga måndag, ifylgje ei melding frå rektor Anne Cathrine Eiken. Kvam vidaregåande skule tilbyr utelukkande digital undervising måndag, ifylgje heimesida til skulen.

Ordførar Torgeir Næss (Ap) seier til HF at terskelen er høg for eit så alvorleg tiltak som å stengja skulane, og har ikkje opplevd liknande i si tid som ordførar. Han seier heradet vil vera føre var.

Han påpeikar at vêrvarselet ikkje var like heftig fredag, men at omfanget av den spådde nedbørsmengda har eskalert i løpet av helga. Difor kom avgjerda i kriseleiinga fyrst sundag.

Næss seier brøytemannskap i teknisk eining har stått og står på for å halda både vegar og avløp opne.

– Dei arbeider det reimer og tøy kan halda, seier han.

Farevarsla formeleg fløymer over hardingane det neste døgeret. Risikoen for både skred av ymse slag, flaum og isete vegar er overhengande. Farevarselet for regn er no på oransje nivå i Hardanger.

Kombinasjonen av høge brøytekantar, islagde kritiske punkt og mykje is gjer det uråd å både strø og hindra overvatn. Framkoma vil difor verta krevjande, spår Kvam herad.

Heradet oppmodar alle arbeidstakarar som har høve til det, om å ha heimekontor måndag.

– Ver merksam på glatte vegar, store vassmengder og rasfare frå tak når du ferdast ute! oppmodar heradet.

I Ullensvang vert fleire vegar, mellom dei fylkesveg 49 mellom Eitrheim ved Odda og Saltkjelen i Jondal, stengde i kveld klokka 21 som eit preventivt tiltak. Det melder Vegtrafikksentralen vest. Situasjonen vil verta vurdert igjen måndag klokka 10.