Frontkollisjon i Ålvik
Tre personar var involverte i ei trafikkulukke ved Kjepso sundag ettermiddag.
Dei tre personane som var involverte i ulukka, kom seg ut av køyretøya etter hendinga. Det vart materielle skadar på bilane, melde 110 Vest på X klokka 16.13. Då var naudetatane på veg til staden. Ulukka vart meld klokka 16.05.
Ifylgje Vest politidistrikt framstod ingen av dei involverte som alvorleg skadde, men nokre hadde smerter i bryst og nakke. Kollisjonsputene vart utløyste i samanstøyten.
Artikkelen held fram under annonsen.
Førarane har teke promilletest. Ingen er mistenkt for å ha køyrt i rusa tilstand.
Bilane vart ståande ved vegen etter ulukka, medan ein venta på bilbergar. Dei stod ikkje plasserte slik at dei var til fare for trafikken, ifylgje politiet.
Politioverbetjent Ann-May Garen ved Kvam politistasjon opplyser at det ikkje vart oppretta sak etter ulukka.
– Det var ikkje personskade, og difor vart det berre skrive skademeldingsskjema, seier ho.
