– Bør kjøpa inn Ljones-kunst

Kvam herad bør kjøpa inn seks verk av tekstilkunstnar Åse Ljones til Strandebarm omsorg.

Det skriv seks representantar for frivillige lag i Strandebarm til heradet. Dei kan ikkje sjå at det enno er gjort noko innkjøp eller investering i utsmykking av Strandebarm omsorg frå heradet eller byggprosjektet si side. Det som så langt synest av utsmykking ved institusjonen, er anten teke med frå Strandebarmheimen eller gjeve som gåver frå bygda, påpeikar dei frivillige.

Det vanlege er at det vert sett av ein del av entreprisekostnadene til kunstnarisk utsmykking ved nye kommunale bygg. Dei frivillige vil tru at noko er tenkt bruka også på dette prosjektet.

Ved å kjøpa fleire verk av same kunstnar ser ein betre dei ulike uttrykk som dei ulike verka gjev, og det vert meir heilskap i utsmykkinga og betre forståing av kunstnaren, meiner strandbermingane. Dei viser til at Ljones er frå Strandebarm og at ho er ein av Noregs fremste tekstilkunstnarar. Samla verdi av dei utpeika verka er 336.000 kroner.

Dei frivillige synest dette er ei utgift som skulle vera godt innanfor det som er vanleg, men dei ser også på henne som ei god investering for Kvam herad, skriv dei.

Brevet er signert av Haldis Flotve, Torill Handal, Hildegunn Røyrvik, Olav Tombre, Anne Fagerhaug og Annlaug Vik.