Vips, no kjem det tips?

Det finst ein app for alt – no også for å tipsa lokalavisa di om kva redaksjonen bør sjå nærare på.

Kanskje du ser noko merkeleg langs vegen eller sit inne med informasjon du tenkjer HF burde ta tak i? Bladstyrar Sigbjørn Linga i Hordaland Folkeblad har i mange år meint at avisa burde ha ei ordning med premiering av gode tips. Då avisa fekk eit godt tilbod frå utviklaren av appen «Tipps», som andre aviser har nytta med hell, tenkte han at det var på tide å gjera eit forsøk.

Dagleg leiar i HF, Kjellaug Camilla Skaar Ljones, gav bladstyraren grønt lys, og no er appen klar til bruk.

Betalar gode tips

«Tipps» er altså ein app der du kan senda inn tips til HF på ein enkel måte, både i form av bilete og tekst, opplyser Linga. Det kjem mange tips til redaksjonen også utan app, men vona er å nå fleire unge og å kunna gje noko tilbake til gode tipsarar.

– Med ei gulrot gidd folk. Og det er jo heilt naturleg. Kvifor bruka energi på oss om ein ikkje får noko att? spør redaktøren.

Kvart tips som kjem inn, vert vurdert og får poeng om det vert godkjent. Poenga kan ein ta ut anten i flaxlodd eller som gåvekort hjå nokre utvalde lokale verksemder når ein har nådd ein viss poengsum.

Eit knakande godt tips gjev meir poeng enn meir kvardagslege tips. Og tipsar ein om noko som frå før er allment kjent – typisk eit arrangement eller liknande –, får ein ikkje poeng. Heller ikkje om redaksjonen er kjend med tipset frå før, fortel Linga.

– Kva vil du få ut av dette?

– Eg håpar å få ut av det ting som me ikkje veit om frå før. Me får mange tips i dag òg, men mykje av det er me på ein eller annan måte kjende med frå før. Så er det langt mellom skikkeleg gode tips, som kan leggja grunnlag for god, kritisk journalistikk, seier han.

– Konfidensielt

Målet er ikkje at folk skal ta bilete av naboen sin litt for store veranda eller finna fram mobilen så snart det skjer ei ulukke. Det er viktig å få fram, meiner Linga.

– Ikkje bli ein person som spring rundt og fotograferer ulukker! Ein lyt oppføra seg som folk og alltid retta seg etter beskjedar frå naudetatane. Og hjelp alltid folk fyrst!

Eit godt tips kan til dømes vera om ein sit med informasjon om at det er noko som ikkje fungerer i pleie og omsorg, som ingen har fått med seg. Eller kanskje ein veit at ei verksemd leverer ulovlege tenester? Då vil HF gjerne vita om det, fortel bladstyraren.

I appen kan ein velja om ein vil vera anonym, og alt vert behandla konfidensielt. Det er ingen risiko for at det vert kjent utanfor redaksjonen kven som har tipsa avisa, seier Linga. Berre redaksjonen får tilgang til namnet på tipsaren. Som det er skildra i Ver varsam-plakaten, oppgjev ein ikkje namn på kjelda til opplysningar som er gjevne fortruleg, med mindre det er avtala med vedkomande.

– Konfidensialitet og kjeldevern er grunnleggjande, seier Linga.