Åtvarar: Fleire sommar-ulykker på livsfarlege vinterdekk

Mange bilistar køyrer framleis med vinterdekk i juni og juli. Den mjuke gummien gir drastisk lengre bremselengder og dårlegare stabilitet i svingar – og mønsteret aukar risikoen for livsfarleg vassplaning.

Forsikringsselskapet If har gått gjennom 1656 takseringar på skader i juni og så langt i juli på bilar forsikra hjå dei. Heile 22,1 prosent av Oslo-bilane som har vore inne til skadetaksering har vore skodde med vinterdekk utan piggar. Viken kjem på neste plass, med 13,9 prosent. Deretter følgjer Agder, der 11,6 prosent hadde vinterdekk på sommarføre. Færrast bilistar på piggfrie vinterdekk er i Møre og Romsdal (1,3 prosent), Innlandet (4,6 prosent) og Rogaland (6,9 prosent).

Kommunikasjonssjef i If, Sigmund Clementz, åtvarar mot vinterdekka av fleire grunnar:

– Gummien i vinterdekk er mjukare enn i sommardekk. Dette gir drastisk lengre bremselengder og dårlegare stabilitet i svingar. Mønsteret på tvers i eit vinterdekk er dessutan laga for å få godt grep på snø og is. I eit sommardekk er det langsgåande riller. Dei er der for å transportere bort vatn, og er heilt nødvendige for å unngå eller redusere effekten av vassplaning, seier kommunikasjonssjefen i If.

(©NPK)