Kven bør heidrast for å ta vare på kulturlandskapet i Vestland?
For første gong skal Kulturlandskapsprisen delast ut i Vestland. Prisen er heider og 30.000 kroner til nokon som har gjort ein ekstra innsats for å ta vare på og utvikla kulturlandskapet.
Alle kan fremje forslag til kandidatar, men spesielt kommunar, landbruksrådgjevinga og faglaga blir oppmoda om å komme med forslag innan fristen 28. februar, opplyser Vestland fylkeskommune på sine heimesider, som saman med Statsforvaltaren i Vestland står bak prisen.
Prisen kan delast ut til både gardbrukarar og grunneigarar, mindre organisasjonar, bygde- og grendelag, grunneigarlag eller andre former for fellestiltak og samarbeid, kommunar, landbruksretta næringsverksemd og FoU-verksemder.
Artikkelen held fram under annonsen.
Vinnaren skal ha gjort ein ekstraordinær innsats for kulturlandskapet, anten det handlar om biologisk mangfald, bygningsvern, verdiskaping, formidling, tilrettelegging og tradisjonar knytt til kulturlandskapet. Medverknad til blest om verdiane i kulturlandskapet i Vestland tel også.
(©NPK)
