Det kan bli dyrt å slurve med måking og strøing på eigen eigedom

Om ein dett på gata grunna is og glatt føre er det eigar av eigedommen som hovudsakleg blir ansvarleggjort. I burettslag og sameige er det styret som forvaltar dette ansvaret.

Viss nokon dett på isen, kan ein også risikere å bli erstatningsansvarleg dersom vedkommande opplever eit økonomisk tap som følgje av fallet.

– Eit heilt sentralt spørsmål vil vere om eigaren av eigedommen kan klandrast for at ein fall. Dette må til for at det skal liggje føre eit erstatningsansvar. Dersom ein ikkje har rutinar for måking og strøing av fellesareala eller ikkje har følgt politivedtektene, vil ein vanlegvis kunne klandrast, seier advokat Line C.B. Bjerkek i NBBL i ei pressemelding.

På fellesareala til bustadselskapet utandørs er det styret som er ansvarleg for å sørgje for tilstrekkeleg vedlikehald og drift. Dette inneber tilstrekkeleg brøyting og strøing i vinterhalvåret. Dette følgjer av vedlikehaldsplikta som blir utført av styret på vegner av bustadselskapet.

På fortau utanfor eigedommen til bustadselskapet, kan ein også ha eit ansvar. I mange kommunar har nemleg politivedtektene føresegner om at eigaren av ein eigedom har ansvar for å rydde fortauet for snø, og å strø fortau utanfor eigen eigedom. Ein bør ta ein titt i desse reglane for å forsikre seg om at ein er kjent med alle plikter. Brot på politivedtektene kan medføre bøter.

Gode rutinar for snørydding og strøing, til dømes ein fast avtale med eit firma, vil antakeleg vere tilstrekkeleg til å unngå erstatningsansvar.

(©NPK)