Åtvarar mot å fyre opp juletreet i peisen
Du bør kanskje tenkje deg om før du eventuelt fyrar opp i peisen eller vedomnen med juletreet.
Med høge straumprisar, dyr ved og ei juletid som nærmar seg slutten, er det freistande å slå to fluger i ein smekk og kvitte seg med juletreet ved å bruke det som ved i peisen.
Det burde ein derimot ikkje gjere, fortel Morten Seljeskog, forskar i termisk energi ved Sintef, på Sintef sin eigen blogg, og omtalt av Nationen.
Artikkelen held fram under annonsen.
Grunnen er at juletreet kan føre til pipebrann. Samstundes som at treet raskt vil gi mykje varme, kan det òg gi frå seg fleire gassar.
Nålene på bartreet inneheld eit høgare nivå av nitrogen enn greiner og stamme, noko som i verste fall kan danne fleire ekstremt giftige, kvelande, irriterande og etsande gasskomponent, forklarar Seljeskog i blogginnlegget.
Stammen på treet kan fungere som brensel, men her gjeld det å vere obs på at trevirket er tørt nok før ein legg det i peisen. Det kan framleis vere fuktig, sjølv om treet er felt for ei stund sidan.
Det blir anbefalt å sjå på moglegheitene for å levere inn treet til eit mottak.
(©NPK)
