Fleire stikk frå stress og svigers i jula

Kvar tredje nordmann har bestilt, eller planlegg å bestille, utanlandstur denne jula. Mange oppgir at dei ynskjer meir tid med familien, men somme stikk også for å unngå stress og svigerforeldra.

Det syner ei ny undersøking frå reisearrangøren Apollo. 24 prosent av dei spurde oppgir kvalitetstid med familien som hovudgrunn til å reise bort, medan 14 prosent vil sleppe stress. I aldersgruppa 18 til 25 år er det så mange som ein av fem som oppgir at dei reiser for å kome seg vekk frå ein hektisk kvardag. Det er dobbelt så mange samanlikna med aldersgruppa 36–45 år. Dei unge har også eit langt høgare ønske om å unngå slektningar og svigerforeldre i jula, enn resten.

Viss nordmenn får velje fritt, vil 42 prosent reise til ein plass der dei er garantert sol og badeliv, og Kanariøyane er i følgje Apollo storfavorittar. 25 prosent av dei spurde føretrekker derimot helgeturar og storbyreise, og like mange oppgir ein takterrasse i ein storby som draumestad for å feire nyttårsaftan.

(©NPK)