Mest blåskjel i Hardangerfjorden – usikre på tilbakegang

Forskarar finn blåskjel i alle regionar, viser dei første resultata frå Havforskingsinstituttets blåskjelovervaking. Det må likevel meir overvaking til før forskarane kan seie om det er færre blåskjel no enn før.

Dei siste åra har Havforskingsinstituttet motteke fleire bekymringsmeldingar om blåskjel som forsvinn. Folk rapporterer om at det er tomt der dei tidlegare har funne mykje skjel. I 2021 starta derfor HI opp ei årleg overvaking av blåskjelbestanden. No er dei første resultata klare, skriv instituttet på nettsidene sine.

– Vi finn blåskjel i alle regionane, frå inst i fjordane til ytst ved kysten. Men vi treng meir data og meir overvaking før vi kan seie noko om det har vorte færre blåskjel eller ikkje, seier forskar Tore Strohmeier.

Overvakinga er gjort i fire regionar; aust, sør, vest og nord. Innanfor kvar region blir 50 til 100 stasjonar undersøkte langs tidevassona.

Dei største samanhengande førekomstane av blåskjel finst i midtre til indre del av Hardangerfjorden. Oslofjorden har minst samanhengande førekomstar av blåskjel, men mest flekkvis fordeling av blåskjela.

– Det er for tidleg å seie noko om det blir færre blåskjel. Å dokumentere slike endringar må gjerast over fleire år fordi blåskjelbestanden varierer naturleg, seier Strohmeier.

(©NPK)