Klyvevegen er open att

Det dårlege vêret har fått Kvam herad til å stengja vegen til Klyve fredag, men no er han open att.

Det opplyser rådmann Anita Hesthamar litt før klokka 13. Vegen kan verta stengd att på kort varsel. Eit tett inntak var årsaka til at det fløymde vatn over den kommunale vegen. Målingar tilseier at kriteria for å stengja vegen ikkje er stetta.

Rådmannen oppmodar, slik også Statens vegvesen gjer i ei pressemelding fredag, alle om ikkje å ferdast på vegane om ikkje dei må. Heradet har hatt eit beredskapsmøte, men har ikkje sett kriseleiing. Førebels har det ikkje vore dramatiske hendingar i Kvam som fylgje av den kraftige nedbøren.

Noregs vassdrags- og energidirektorat sende i føremiddag varsel om at flaumfaren er heva til raudt nivå i indre og midtre delar av Vestland. Kommunane er inviterte til møte med Statsforvaltaren om situasjonen klokka 12.

Raudt farenivå inneber at det er risiko for til dømes erosjons- og flaumskadar og overfløyming.