Vestlendingane var ivrige strandryddarar

Strandryddeveka frå 9.–18. september hadde nesten dobbelt så mange registrerte ryddeaksjonar som i fjor. Aller ivrigast var vestlendingane.

Så mange som 478 ulike ryddeaksjonar er registrerte via nettsida Rydde i år. Det svarer til ein auke på 47 prosent fleire ryddeaksjonar samanlikna med same tid i fjor.

– Det er fantastisk å sjå at såpass mange har registrert aksjonen sin i Rydde. I år har vi hatt ei storsatsing på Strandryddeveka der vi har prøvd å nå ut til folket ved å leggje til rette for både store og små arrangement, fortel prosjektleiar for opprydding i Hold Norge Rent, Heidi Gromstad, i ei pressemelding.

Dersom du har rydda utan å registrere så er det framleis ikkje for seint å registrere aksjonen din. Dette er viktig fordi det bidreg til folkeforsking og gir kunnskap om forsøplingsproblemet i Noreg, skriv Hold Norge Rent i pressemeldinga.

Vestland fylke har førebels flest registrerte aksjonar med 206, og 70 prosent av dei aksjonane kan knytast direkte til den gigantiske aksjonen «Rein Hardanger».

På andre plass ligg Agder med 39 oppretta aksjonar, så Viken med 37 aksjonar og deretter Nordland med 36 aksjonar. Det er også oppretta éin aksjon på Svalbard, utført på «Tur med meining»-dagen.

(©NPK)